Në Kajro, mbledhje e ministrave të jashtëm të vendeve arabe
(17.06.2009 RV)Sot në Kajro të
Egjiptit janë mbledhur ministrat e jashtëm të vendeve arabe për të diskutuar mbi propozimet
amerikane për procesin e paqes në Lindjen e Mesme. Është një ngjarje me rëndësi, po
të merren parasysh deklaratat e fundit të qeverisë izraelite për krijimin e mundshëm
të një shteti palestinez. Por cili është qëndrimi i botës arabe për të ardhmen e marrëdhënieve
izraelito-palestineze? Të dëgjojmë ekspertin italian të Lindjes së Mesme, Xhorxho
Bernardeli: Është e vërtetë se Netanijahu e tha më në fund fjalën e famshme
mbi shtetin palestinez, por duke vënë dy kushte tepër të rënda: i pari është çmilitarizimi
i shtetit të ri dhe, i dyti, edhe më i rëndë, është që Jeruzalemi nuk preket. Askush,
në botën palestineze, nuk do të pranojë kurrë të fillojë bisedime të vërteta me këto
kushte. Roli i SHBA-ve është i rëndësishëm në ndërmjetësimin ndërkombëtar,
i cili sigurisht do të jetë i nevojshëm… Besoj që po. SHBA-të kanë vendosur
të luajnë një rol të rëndësishëm në këtë fazë e procesi i paqes do të jetë i gjatë.
Izraeli ka një politikë, që shkon në kahen diametralisht të kundërt me procesin e
paqes dhe, të mos harrojmë, se autoriteti palestinez përjeton një krizë të thellë
prej muajsh. Por, faktikisht, impenjimi i administratës amerikane, me praninë e Xhorxh
Miçëllit në terren, po i ndryshon kartat mbi tryezë.