(16.06.2009 RV)Situata në Iran mbetet e nderë një ditë pas protestave kundër
Ahmadinexhadit të cilat shkaktuan shtatë të vdekur në radhët e demonstruesve. Këto
protesta e shtynë Këshillin e Rojeve - organi më i lartë legjislativ ky në Iran -
të deklarojë se është i gatshëm për një numërim të pjesshëm të votave, por kurrsesi
për përsëritjen e votimeve presidenciale zhvilluar të premten e kaluar. Kundërshtime
tepër të ashpra për këto votime ka pasur veçanërisht nga ana e studentëve të cilët
përkrahin kandidatin reformator Mir Hysein Musavi. Me qindra simpatizantë të Musavit
protestuan sot në zonën veriore të kryeqytetit iranian, në afërsi të televizionit
shtetëror. Kurse protesta e tyre e meparshme, planifikuar për në sheshin Vali Asër,
ku u mbajt edhe manifestimi i mbështetësve të Ahmadinhexhadit, u pezullua pas thirrjes
që bëri vetë Musavi me qëllim që të shmangej gjakderdhja e mëtejshme. Pasqyrimi
i ngjarjeve të fundit nga mjetet e informacionit u bë më i vështirë si pasojë e dekretit
të Ministrisë iraniane të Kulturës, i cili ua ndaloi gazetarëve të huaj të ishin të
pranishëm në këto demonstrata. Nga fundi i javës që shkoi e deri tani, njoftohet
se në vend janë kryer më se dyqind arrestime, ndër të cilat bëjnë pjesë edhe reformatorët
Saed Haxharian dhe Muhamed Ali Abtahi, të dy mbështetës të ish-presidentit Khatami,
si edhe vetë vëllai i presidentit Khatami. Ndërkaq Ahmadinexhadi gjendet në Jekaterinburg,
Rusi për takimin e Grupit të Shangait. Prej këtej ai nuk harroi të sulmojë edhe një
herë SHBA duke thënë se koha e perandorive ka kaluar tashmë