ВАТЫКАН: Папская Рада пастырства сярод падарожных і эмігрантаў праводзіць Канфярэнцыю
"Рэлігійныя дзеячы разам супраць эксплуатацыі людзей". Гаворка, перш за ўсё, аб барацьбе
з гандлем "жывым таварам".
Як сказаў ва ўступным слове прэзідэнт Рады монсіньёр Вельё, няма сумніву, што трафік
жанчын і дзяцей з'яўляецца злачынствам. У суарганізатарах цяперашняга Кангрэсу - Міжнародны
саюз генералаў і настаяцеляк ордэнаў (УІСГ) і ОІМ, якія ад 2004 году пастаянна супрацоўнічаюць
з сілавымі структурамі па цэлым свеце ў няспынным змаганні з феноменам сучаснага нявольніцтва
жанчын і дзяцей. Менавіта 2 гэтыя арганізацыі стварылі 15 міжнародных структур, у
якія падключыліся 252 жаночыя манаскія кангрэгацыі ў 36 краінах свету. Статыстыка
гаворыць аб трафіку больш за 4х млнаў ахвяр сэксуальнага бізнесу. "Царква ,- сказаў
прэзідэнт Папскай рады, - тут адыграе не толькі ролю змагара за правы асобы, але і
нясе прарочую місію, бо ад поспеху барацьбы залежыць будучыня мноства людзей. Сітуацыя
дайшла да такіх жудасных памераў, бо шмат гадоў факты замоўчваліся, уладныя структуры
і сілы кантролю "саромеліся" і фальшывілі, асабліва адносна некаторых вышэйшых кампанентаў
грамадства", -(маецца на ўвазе. замешаных у бізнесе як гандляры ці кліенты). Трафік
чалавечых істот - рэальна існуе, ахвярамі з'яўляюцца па-большасці жанчыны і дзеці,
скарыстаныя для нажывы ў сэксуальным бізнесе праз гвалт і забойствы. Нават выратаваныя
назаўсёды трымаюць у сабе псіхалагічную траўму. Большая частка краін, параненых гэтай
ганьбай разбэшчанасці, нават не прызнае існавання праблемы ў вялікім памеры, не прызнае,
што гандаль людьмі падпітваецца на мясцовым, лакальным узроўні існавання падпольных
ці адкрытых устаноў сэксуальнага скарыстання і гвалту. Старшыня Канфярэнцыі прыклікаў
усіх рэлігійных дзеячаў, якія апякуюцца жанчынамі і дзецьмі, пашкоджанымі такім жудасным
скарыстаннем іхняе асобы, быць асабліва дэлікатнымі і аберагаць эмацыянальную і духоўную
сферу кожнай ахвяры сэксуальнага бізнесу. Прынята рашэнне супрацоўнічаць у гэтай галіне
з мясцовымі ардынарыямі і нацыянальнымі Біскупскімі Канфярэнцыямі ў розных краінах
свету, прычым таксама і на прынцыпе экуменізму і міжрэлігійныга дыялогу ва ўз'яднанні
з іншымі рэлігійнымі групамі, мясцовымі ўладамі і ўрадамі, калі ёсць такая магчымасць,
грамадскімі фарміраваннямі на розных узроўнях.