“Të pranohet sfida e Ungjillit”: mesazh i françeskanëve, të mbledhur në Asizi, drejtuar
ministrave të ekonomisë së G8.
(15.06.2009 RV)Hynë në fazën përfundimtare
punimet e Kapitullit të përgjithshëm të Urdhërit të Fretërve të Vegjël, i cili do
të vijojë deri më 20 qershor në Bazilikën e Shën Marisë së Engjëjve në Asizi, përqëndruar
tek tema: “Të pranohet sfida e Ungjillit!”. Fretërit e vegjël u drejtuan një mesazh
Ministrave të Ekonomisë të G8, mbledhur në Leçe, duke u kujtuar se “njohja e disa
të drejtave të patjetërsueshme të njeriut nuk është e mjaftueshme”. Gjatë Kapitullit
u ripohua, ndërmjet tjerash, se mesazhi françeskan , edhe sot e kësaj dite, lidhet
ngushtë me vënien e njeriut në qendër të jetës. Këtë thekson, në mikrofonin e Radios
sonë, edhe françeskani Mirko Selito, i ngarkuar me shtypin në Kapitull:
Përgjigje:
- Françesku nuk deshi ta kufizojë rregullin e vet në fusha të veçanta,
por përfshiu në të njeriun me të gjitha nevojat e tij. Rregulli françeskan sot aktualizohet,
siç thotë edhe Koncili II i Vatikanit, duke qenë gjithnjë pranë njeriut, me gëzimet
e dhimbjet, vuajtjet e shpresat e, sidomos, me përpjekjen për t’i dhënë përgjigje
të përshtatshme pyetjeve themelore të shpirtit njerëzor në të gjitha kohët. Atëherë
atje ku është njeriu i varfër, materialisht, shpirtërisht a kulturalisht, atje duhet
të jenë edhe sivëllezërit e Varfajakut të Asizit, për t’u dhënë përgjigje të krishtera
të varfërve të vjetër e të rinj.
Pyetje: - Edhe
atë José Rodriguez Carballo, në fjalimin e mbajtur pasi u rizgjodh Epor i përgjithshëm,
foli për të varfër të rinj. Kush janë këta të varfanjakë?
Përgjigje:
- Falë pranisë sonë kapilare në botë, jemi në gjendje t’i njohim këto ‘të
varfër, pa bukë e pa të drejta, njerëz që nuk kanë zë në shoqërinë e tyre; që për
shkak të ndryshimeve të globalizmit a të dixhitalizmit, mbeten në bisht të zhvillimit
shoqëror. Janë këta të varfërit e rinj, që u shtohen atyre, të cilët nuk kanë para,
jetojnë në mjerim të plotë, shfrytëzohen deri në palcë. Të varfër të rinj, ndoshta,
janë edhe ata, që bota e sotme nuk dëshiron t’i kujtojë, të varfërit e përhershëm,
por që sot nuk përfillen fare.