Editorial i Atë Federiko Lombardit mbi Vitin kushtuar meshtarëve
(13.06.2009 RV)Më 19 qershor, Papa
Benedikti XVI do të shpallë fillimin e Vitit kushtuar meshtarëve. Por a është ky,
një vit vetëm për meshtarët? Të dëgjojmë komentin e zëdhënësit të Vatikanit, atë Federiko
Lombardi, njëkohësisht edhe drejtori ynë i përgjithshëm: “Edhe meshtarët duhet
të kujtohen për lutjen!”. Me këto fjalë, Benedikti XVI e ka shoqëruar shpesh dhënien
e rruzareve për priftërinjtë, që e përshëndesin në përfundim të ndonjë audience ose
të ndonjë takimi me të. Mua më ka ndodhur mëse një herë. Këto fjalë më
erdhën ndërmend kur Papa shpalli “Vitin Meshtarak” që do të fillojë, në 150-vjetorin
e vdekjes së Shën Gjon Maria Vianejt, Famullitarit të Shenjtë të Arsit, model i shkëlqyer
përshpirtërie dhe zelli për të gjithë meshtarët, sidomos nëse impenjohen në veprimtarinë
baritore. “Është gjithnjë i fortë tundimi për ta reduktuar lutjen në një
çast të sipërfaqshëm ngutjeje, duke e lënë veten në dorë të veprimtarive e shqetësimeve
njerëzore”, thotë më pas Papa. I bëjnë jehonë fjalët e Famullitarit të Arsit: “Ka
disa që duket sikur i thonë kështu Zotit: ‘Kam vetëm dy fjalë për të thënë, kështu
do të mbaroj shpejt e do të largohem prej Teje”. Nëse problemi i bashkimit
me Hyjin është për të gjithë të krishterët, ai është i tillë veçanërisht për meshtarët,
që thirren nga çdo anë, ndërsa numri i tyre zvogëlohet ose mbetet më i vogël nga ç’pritet
e ç’duhet. Natyrisht, shenjtëria e meshtarëve është para së gjithash përgjegjësi
e tyre, por ka të bëjë edhe me krejt bashkësinë e besimtarëve. Mjaftojnë pak meshtarë
të padenjë për ta lëkundur thellë besueshmërinë e Kishës. E nga ana tjetër, solidariteti
shpirtëror i bashkësisë është mbështetje e fuqishme për jetën e tyre shpirtërore dhe
apostolike. Me një fjalë: Viti Meshtarak nuk vlen vetëm për priftërinjtë, por për
të gjithë.