Rregulla e vlera për një zhvillim të qëndrueshëm e solidar: takim i Fondacionit “Centesimus
Annus” në Gregoriana
(12.06.2009 RV)“Rregulla e vlera
për një zhvillim të qëndrueshëm e solidar”: kjo është tema e takimit ndërkombëtar,
organizuar nga Fondacioni “Centesimus Annus – Pro Pontefice”, që po mbahet në Universitetin
Papnor Gregorian në Romë. Në këtë takim, i cili nisi me një Meshë, kremtuar nga
kryeipeshkvi Klaudio Maria Çeli, asistent ndërkombëtar i Fondacionit, marrin pjesë
shumë ekonomistë, të cilët po shkëmbejnë mendime për realitetin e sotëm ekonomik e
financiar, parë në dritën e Doktrinës Shoqërore të Kishës. Nesër kardinali Atilio
Nikora do të kremtojë, pranë Shpellës së Lurdës, në Kopshtet e Vatikanit, Meshën për
anëtarët e Fondacionit, të cilët më pas do të takohen me Papën. Për një reflektim
mbi temën e takimit, ftuam në mikrofonin tonë profesor Alberto Kuadrio Kurzio-n,
kryetar i Komitetit Shkencor të Fondacionit:
Përgjigje: - Ne mendojmë
se vlerat themelore, sipas mësimit shoqëror katolik, që jep një orientim ideal, janë
tri: vlera e solidaritetit krijues, vlera e ndihmës si shprehje e demokracisë në veprim,
dhe roli i ekonomisë, edhe ky i rëndësishëm. Por duhet pasur mirë parasysh se ekonomia
ka nevojë për një shpirt të bazuar mbi etikën. E këtë e kanë theksuar shumë herë si
Gjon Pali II, ashtu edhe Benedikti XVI. Për fat të keq, e kaluara flet për vërshimin
e formave të ndryshme të spekullimit e, prej këndej, edhe për zhvleftësimin e vlerave
të etikës së punës, të fantazisë krijuese e të aftësisë për të hapur rrugë të reja
zhvillimi. Shpresoj se kjo krizë, shumë e rëndë dhe e dhimbshme, do të ndikojë që
të gjithë njerëzit jo vetëm t’i kuptojnë këto vlera, por edhe t’i pohojnë, përmes
bashkëpunimit ndërkombëtar e rrugës së dialogut.