Kryeipeshkvi Tomazi: rruga për të dalë nga kriza kërkon mbrojtjen e vendeve të punës
dhe të dinjitetit të punëtorëve.
(12.06.2009 RV)Lakmia e pangopur
e disa drejtuesve të ekonomisë është një nga shkaqet themelore, në zanafillë të krizës
së rëndë financiare, që po trondit sot mbarë botën. Kështu u krijua një ekonomi dixhitale,
e shkëputur nga aftësia prodhuese reale, nga shërbimet shoqërore e nga vlerat etike.
Këtë theksoi vëzhguesi i përhershëm i Selisë së Shenjtë pranë OKB-së së Gjenevës,
imzot Silvano Maria Tomazi, gjatë fjalimit të mbajtur dje në Konferencën vjetore
të Organizatës ndërkombëtare të punës (Ilo), që filloi punimet në Gjenevë më 3 qershor
e do të përfundojë më 19 të muajit në vijim. Në takimin e madh marrin pjesë rreth
4 mijë delegatë, përfaqësues të qeverive, të botës së sipërmarrjeve e të punëtorëve,
që po ndajnë së bashku shqetësimet për ndikimin e krizës mbi tregun e punës. Duke
folur në mikrofonin e Radio Vatikanit, Imzot Tomazi rikujtoi se për të dalë nga
kriza aktuale ekonomike e financiare, duhet të merren masa urgjente e konkrete, që
kanë të bëjnë me ndryshimin e sjelljes, të rregullave e të vlerësimeve të gabuara,
që e shkaktuan. M’u duk e arsyeshme të kujtoj, para së gjithash – tha përfaqësuesi
i Vatikanit - se kriza nuk është thjeshtë rezultat i funksionimit të keq të ndonjë
ingranazhi të mekanizmit ekonomik, por kryesisht, rezultat i mungesës së vlerave etike.
E pikërisht mospërfillja ndaj këtyre vlerave është në rrënjë të krizës.