Ipeshkvijtë italianë botojnë “Letër njerëzve që kërkojnë Zotin”: intervistë me imzot
Bruno Forte
(12.06.2009 RV)“Si besimtarë
në Jezu Krishtin, të shtyrë nga dëshira për ta bërë të njohur Atë, që i jep kuptim
e shpresë jetës sonë, u drejtohemi me respekt e miqësi të gjithë njerëzve në kërkim
të Zotit”: kështu fillon kjo “Letër drejtuar kërkuesve të Zotit”, përgatitur nga Komisioni
i Konferencës ipeshkvnore italiane për doktrinën e fesë, kryesuar nga kryeipeshkvi
i Kieti-Vastos, Bruno Forte. Dokumenti, botuar sot i plotë në gazetën italiane ‘Avvenire’,
niset nga disa pyetje, që lindin në shpirtin e shumë njerëzve, për të propozuar, pastaj,
kumtimin e krishterë. Në mikrofonin e Radios sonë, Imzot Bruno Forte, thekson
arsyet që e shtynë ta hartonte këtë Letër:
Përgjigje: - Në shoqërinë
pas-moderne, duket gjithnjë më qartë se transmetimi i fesë nuk mund të konsiderohet
i përfunduar. Kemi nevojë ta kumtojmë gjithnjë sërisht kerygmën, dmth mesazhin kryesor,
të gëzueshëm, të dashurisë së Zotit, që na u dëftua në Jezu Krishtin. E kjo nevojë
për kumtimin e parë, tejet e dukshme në shoqëritë e shekullarizuara të perëndimit,
por edhe në vendet ku Ungjilli njihet vetëm pjesërisht, të shtyn të mendosh se tekstet,
si Katekizmi i Kishës, kanë rëndësi të dorës së parë. E megjithatë, as ky tekst nuk
i përgjigjet kërkesës për kumtimin e parë, sepse është e nevojshme të themi shumë,
me pak fjalë. Ja, pra, pse teksti i Letrës i përgjigjet kërkesës. Një paraqitje e
shkurtër, që përmbledh Ungjillin, mesazhin e fesë, në të cilën ndjehet dëshira për
të thënë shumë, pa u zgjatur, ndonëse, natyrisht, jo gjithçka mund të zhvillohet e
të thellohet, si në tekstet e Katekizmit.
Pyetje: - Letra shkruhet
me një gjuhë të thjeshtë, të drejtpërdrejtë,e nganjëherë edhe me stilin e bisedës…
Përgjigje:
- Natyrisht. Pikërisht për të dëshmuar fytyrën e një Kishe mike, gjithnjë pranë
zemrës njerëzore, së cilës dëshiron t’i flasë, ta ndihmojë për t’i dhënë përgjigje
pyetjeve të mëdha, që e mundojnë. Nuk duam të flasim për Kishën që thotë ‘jo, që
ndalon, por, sipas mësimeve të Benediktit XVI, për mesazhin e Kishës, e cila i thotë
‘po’ Hyjit në Jezu Krishtin, i thotë ‘po’ jetës, dashurisë, gëzimit, bukurisë, që
përçon Ungjilli i Jezu Krishtit në botë.