Botohet programi i vizitës baritore të Atit të Shenjtë në San Giovanni Rotondo, më
21 qershor.
(10.06.2009 RV)Sot u njoftuan zyrtarisht
takimet e vizitës baritore të Benediktit XVI në San Giovanni Rotondo, më 21 qershorin
e ardhshëm. Papa do të niset në orën 8. 00 me helikopter nga eliporti i Vatikanit,
për të arritur në 9.15 në Fushën e Sportit ‘Antonio Masi’ të San Giovanni Rotondo-s.
Njëzet minuta më pas do të vizitojë privatisht Shenjtëroren e Shën Marisë së Hireve
e do të gjunjëzohet për t’u lutur pranë relikeve të Shën Piut nga Pietrelçina, që
pushojnë në paqe në kriptë. Me besimtarët do të takohet në orën 10. 30 në tremen
e Kishës kushtuar fratit kapuçin, ku Benedikti XVI do të kryesojë Meshën Shenjte e
do të mbajë edhe homelinë, për ta përfunduar, më pas, kremtimin, me lutjen e Engjëllit
të Tënzot. Pasdite, në orën 16. 30, Papa do të takohet, në hajatin e madh të Shtëpisë
së Lehtësimit të Vuajtjes, me të sëmurët, personelin mjekësor e drejtuesit, të cilët
do t’i përshëndesë. Në orën 17. 30 e kanë radhën priftërinjtë, rregulltarët, rregulltaret
e të rinjtë në Kishën e Shën Piut nga Pietrelçina. Vizita do të përfundojë pas
orës 18. 00, kur Benedikti XVI do të riniset me helikopter për t’u kthyer në Vatikan.