Kisha është kërkuese me meshtarët për hir të dashurisë së Krishtit e të popullit të
Zotit: kështu Papa me bashkësinë e Seminarit francez në Romë
(06.06.2009 RV)Benedikti XVI priti
sot në Vatikan bashkësinë e Seminarit francez në Romë. Institucioni, i themeluar prej
mëse një shekulli e gjysëm nga Kongregata e Shpirtit Shenjt, i besohet tani Konferencës
Ipeshkvnore Franceze. Në fjalën që mbajti para të pranishmëve në Sallën Klementina
në Vatikan, Papa u ndal në detyrat e seminaristëve dhe të edukatorëve të tyre, si
edhe përsëriti rëndësinë e shërbimit meshtarak për jetën e Kishës: “La tâche
de former des prêtres est une mission délicate...” “Detyra
për të formuar priftërinjtë – theksoi Ati i Shenjtë – është një mision delikat”. Formimi
që propozohet në seminare është kërkues, sepse meshtarëve të ardhshëm do t’u besohet
populli i Zotit, “ai popull, që Krishti e shëlboi duke dhënë jetën e vet”. Prandaj,
vazhdoi Papa, është mirë që seminaristët ta kuptojnë se Kisha është kërkuese ndaj
tyre, sepse ata duhet të kujdesen më pas për njerëzit që u ka besuar Krishti. E Benedikti
XVI rreshtoi sjelljet, që duhet të karakterizojnë meshtarin e ardhshëm:
“La maturité humaine, les qualités spirituelles...” “Pjekuria njerëzore,
cilësitë shpirtërore e akoma, zelli apostolik e përpikmëria intelektuale”. Papa theksoi
se për të arritur në këto virtyte, është e rëndësishme që seminaristët të kenë përpara
shembullin e edukatorëve të tyre. Përsëriti kështu, fjalët e kardinalit Suhar për
ministrat e Krishtit: “Eternel paradoxe du prêtre. Il porte en lui les contraires...” “Paradoksi
i përjetshëm i meshtarëve – tha Papa, duke cituar prelatin francez - bart mbi vete
kundërshti: pajton, me çmimin e jetës, besnikërinë ndaj Zotit e ndaj njeriut”. Meshtari,
thoshte kardinali Suhar, nuk ka në dorë mjete politike, as burime financiare apo forcën
e armëve, forca e tij është pikërisht se nuk ka armë, por mund të bëjë gjithçka në
Krishtin. “Këto fjalë që evokojnë kaq mirë Famullitarin e Shenjtë të Arsit – uroi
Benedikti XVI, duke përmendur shenjtin në bazë të Vitit meshtarak, që do të fillojë
më 19 qershor – të tingëllojnë si thirrje vokacionale për shumë të rinj të krishterë
francezë, që dëshirojnë një jetë të dobishme e të frytshme në shërbim të dashurisë
së Zotit”.