Editorial i Atë Federiko Lombardit: “Jo ndeshjes ndërmjet qytetërimeve”
(06.06.2009 RV)Java e kaluar u karakterizua
politikisht nga vizita e presidentit amerikan Barak Obama në Lindjen e Mesme, posaçërisht
në Arabinë Saudite dhe në Egjipt, e më pas në Evropë, në Gjermani e Francë. Edhe në
konferencën e fundit të shtypit, mbajtur sëbashku me presidentin francez Nikolas Sarkozì,
Obama përsëriti impenjimin amerikan për zgjidhjen e konfliktit ndërmjet izraelitëve
dhe palestinezëve, me krijimin e dy shteteve; paralajmëroi Iranin dhe Korenë e Veriut
se bashkësia ndërkombëtare nuk do t’i lejojë të kenë armë bërthamore dhe shprehu mendimin
se Turqia duhet të hyjë në Bashkimin Evropian. Pa dyshim, çasti kulmor i vizitës së
tij ishte fjalimi i mbajtur në Kajro për marrëdhëniet ndërmjet Perëndimit dhe botës
islamike. Të dëgjojmë komentin e zëdhënësit të Vatikanit, atë Federiko Lombardi,
i cili është edhe drejtori i përgjithshëm i Radios sonë: Gjatë viteve të kaluara
është folur shumë për rrezikun e ndeshjes së qytetërimeve, në veçanti për ndeshjen
ndërmjet botës myslimane dhe asaj perëndimore, pas 11 shtatorit. Kisha Katolike ka
qenë gjithnjë vendosmërisht kundër këtij interpretimi të realitetit botëror, duke
u përqëndruar në mirëkuptimin e anasjelltë ndërmjet popujve, kulturave e feve e duke
u impenjuar aktivisht që kundërshtitë e keqkuptimet të mos thellohen e të mos shkaktojnë
fillimin e konflikteve e të luftës. Që këtej, linja e dialogut ndërfetar dhe kërkimi
i vazhdueshëm i paqes. Udhëtimi i fundit i Papës në Tokën Shenjte ishte tregues shembullor
për këtë. Tani, edhe fjalimi i Presidentit amerikan Obama në Kajro, që
ka për qëllim të vendosë marrëdhënie të reja ndërmjet Amerikës dhe botës myslimane,
shkon në këtë drejtim e shton në horizontin botëror një element shprese. Pesha e padyshimtë
politike e SHBA-ve përdoret qartë për arritjen e disa objektivave, që janë tepër të
rëndësishme për paqen në botë. Impenjimi për zgjidhjen e konfliktit ndërmjet izraelitëve
dhe palestinezëve, pohimi, jo vetëm i nevojës së mospërhapjes së armëve bërthamore,
por edhe më tej, ai i çarmatimit bërthamor për të gjitha kombet. E më pas, kuadri
më i gjerë i lirisë fetare, i dinjitetit të gruas, i demokracisë dhe i zhvillimit
të popujve. Janë drejtime, për të cilat shumë persona vullnetmirë dëshirojnë të bashkëpunojnë
për të gjetur rrugët e drejta, ku të ecë njerëzimi e ku, urojmë të takohen edhe ata
që besojnë në Zotin krijues dhe mirëdashës të paqes.