(05.06.2009 RV)Në Lindjen e Mesme
po bie ora e paqes: presidenti amerikan Barak Obama pohoi se “tani është çasti” për
të vepruar, që të arrihet në zgjidhjen përfundimtare, të bazuar mbi dy shtete, një
izraelit e tjetri palestinez. Obama, që akutalisht ndodhet në Gjermani, mbajti
sot një konferencë të përbashkët shtypi me kancelaren Angela Merkel. Ai nënvizoi se
me fjalimin në Kajro, SHBA-të krijuan atmosferën e përshtatshme për rifillimin e bisedimeve,
por shtoi edhe se secili duhet të luajë rolin që i takon, pasi Amerika nuk mund ta
imponojë paqen. Në veçanti, sipas Obamës, palestinezët duhet të zgjidhin problemet
e tyre të brendshme dhe izraelitët duhet të ndalojnë shtrirjen e ngulimeve hebraike
në Çisjordani. Përsa i përket frontit iranian, Obama siguroi se SHBA-të janë gati
për një dialog serioz me Teheranin, i cili duhet të zhvillohet në lidhje të vazhdueshme
me grupin e ndërmjetësuesve “5+1”, ku marrin pjesë anëtarët e Këshillit të Sigurimit
të OKB-së plus Gjermania. Në fund, presidenti amerikan u tregua optimist për rolin
e SHBA-ve në përmirësimin e ndryshimeve të klimës, shkaktuar nga njeriu. Ai premtoi
se do t’i bashkojë forcat me Evropën, e cila po bën hapa të mëdha përpara në këtë
drejtim. Pasdite, Barak Obama vizitoi ish-kampin e përqëndrimit nazist të Bukenvaldit.
Në një intervistë për një televizion gjerman, duke kujtuar pretendimet e presidentit
iranian, Ahmadinexhad se Holokausti i Luftës II Botërore nuk ekziston, Obama komentoi:
“Le të shkojë në Bukenvald. Nuk kam durim me ata që mohojnë historinë. E historia
e shfarosjes së hebrenjve nuk është aspak hipotezë”. Në mbrëmje, presidenti amerikan
u transferua në Francë për të marrë pjesë në kremtimet për zbarkimin e aleatëve në
Normandi, gjatë Luftës II Botërore.