Benedikti XVI inkurajon zbatimin e plotë të Konventës së OKB-së për të drejtat e fëmijëve
(04.06.2009 RV)Është urgjente më shumë se kurrë të zbatohet plotësisht Konventa
e OKB-së për të drejtat e fëmijëve: kjo është thirrja e Papës Benedikti XVI në një
mesazh, që mban firmën e sekretarit të Shtetit të Vatikanit, kardinalit Tarçizio Bertone.
Mesazhi u lexua sot paradite nga kryeipeshkvi Silvano Maria Tomazi, në mbledhjen e
organizuar në Gjenevë nga Biçe, Byroja ndërkombëtare katolike për fëmijët, e cila
po promovon me një sërë iniciativash, atë që e ka quajtur “Thirrja botërore për një
mobilizim të ri në favor të fëmijëve”. Konventa e OKB-së mbush tashmë 20 vjet
e zbatimi i saj, nënvizon Ati i Shenjtë në mesazh, është i domosdoshëm para sfidave
të reja epokale. Papa vë theksin mbi “respektimin e dinjitetit dhe të drejtave të
patjetërsueshme të fëmijëve”, mbi “njohjen e misionit themelor edukativ të familjes”
dhe mbi “nevojën e një ambienti shoqëror të qëndrueshëm, që të favorizojë zhvillimin
fizik, kulturor e moral të çdo fëmije”. Benedikti XVI i inkurajon institucionet katolike
dhe organizatat jo qeveritare të vazhdojnë punën për zbatimin e drejtë të Konventës
e për ndërtimin e një të ardhmeje shprese, sigurie e lumturie për fëmijët e kësaj
bote. Vëzhguesi i Vatikanit në selinë e OKB-së në Gjenevë, imzot Silvano Maria
Tomazi shpjegon në mikrofonin tonë përmbajtjen dhe rëndësinë e Konvetës për të
drejtat e fëmijëve: “Kjo Konventë ka parime themelore si e drejta për jetën,
e drejta për edukimin, për mbrojtjen, për lirinë e fëmijëve e, sidomos, i konsideron
fëmijët si persona me të drejta, që duhen njohur e respektuar si të drejta njerëzore.
Është e nevojshme të përtërijmë përpjekjet për t’i kthyer në vepra. Për këtë, Byroja
ndërkombëtare për fëmijët (Biçe) bën një thirrje globale që këto parime të përgjithshme
të kthehen në aksione konkrete. Thirrja globale dëshiron ta shkundë botën nga plogështia
e t’i nxisë shtetet që të marrin masa konkrete për fëmijët. Në këtë perspektivë, ne
impenjohemi dhe kemi organizuar këtu në Kombet e Bashkuara, jo vetëm një aktivitet
diskutimi e sensibilizimi, por edhe një ekspozitë me vizatimet e fëmijëve, me fotografi
që tregojnë gjendjen e vërtetë të botës, përsa u përket problemeve të vogëlushëve.
Tregojnë gjithashtu cilat janë masat konkrete që merren, cila është rruga më e mirë
për t’i nxjerrë fëmijët nga situatat e vështira, që nuk respektojnë në asnjë mënyrë
dinjitetin e tyre”.