General Motors deklaron falimentimin. Ndërhyn Shtëpia e Bardhë për të shpëtuar së
paku një pjesë
(01.06.2009 RV)Firma e parë automobolistike
e botës, amerikania General Motors, deklaroi sot falimentimin. Shtëpia e Bardhë do
të japë gjithsesi ndihma për 30.1 miliard dollarë, duke u bërë kështu aksionistja
kryesore me 60% të kuotave. Procesi falimentar do të bëhet hap pas hapi, duke shkëputur
prej firmës pjesët më të shëndosha, që do të themelojnë një firmë të re, me pjesëmarrjen
e Kanadasë dhe të Fiatit italian. Por, pse prodhimi automobilistik është kaq i rëndësishëm
për ekonominë bashkëkohore? Pyetëm një ekonomist ndërkombëtar në Universitetin
e Torinos, Marko Dealion. Ta dëgjojmë: Është e rëndësishme për dy arësye.
Së pari, nevoja për t’u zhvendosur është diçka e rrënjosur thellë, një nga nevojat
të cilave u është përgjigjur më shumë shoqëria industriale, duke u bazuar mbi firmat
private. Së dyti, industria e makinave është e rëndësishme pasi është pikëmbërritja
e shumë industrive, pikë kyçe për prodhimin e shumë sektorëve, që kanë të bëjnë me
makinat. Të mendojmë për shembull, gomat, pjesët elektrike, kambion, frenat etj. Vlerësohet
se për çdo punëtor të firmave automobilistike, ekzistojnë së paku katër që furnizojnë
komponentet përbërëse të makinës, dhe së paku një ose dy, që vijnë pas prodhimit,
si punonjësit e sigurimeve, apo të pompave të benzinës. Profesor, kurrë si
për industrinë automobilistike, qeveritë nuk kanë qenë kaq të gatshme të financojnë
me paratë e taksave, pra me paratë publike, firma private. Deri dje, parimi që mbizotëronte
ishte ai i mosndërhyrjes e kjo vlen si për SHBA-të, ashtu edhe për Evropën. A është
kështu? Po, ashtu është. Këto kritere nuk zbatohen më pas krizës financiare.
Po të ndiqeshin, do të kishim miliona e miliona të papunë e asnjë vend nuk mund ta
lejojë diçka të tillë, as Shtetet e fuqishme të Bashkuara të Amerikës. Të papunët
do të shkaktonin një krizë edhe më të madhe, pasi do të ulej konsumi i të mirave materiale
në të gjithë vendin. Nga pikpamja e ekonomisë së tregut, është momenti i një emergjence
për të cilën tregu duhet të heshtë, për hir të shëndetit publik – ta quajmë kështu
– e qeveritë të ndërhyjnë. Nga pikpamja e atyre që nuk e duan ekonominë e tregut mund
të themi se sistemi i bazuar mbi të ka dështuar. Duhet që në çdo moment të kemi një
lloj pranie shtetërore, si siguri.