Një teolog katolikë emërohet ambasador i ri i SHBA-së pranë Selisë së Shenjtë
(28.5.2009 RV)Presidenti i SHBA-së, Barak Obama, ka shpallur emërimin e Miguel
H. Diaz, teolog katolikë me origjinë nga Kuba, si ambasador të Amerikës pranë Selisë
së Shenjtë. Emërimi, që duhet të miratohet nga Senati, është shpallur zyrtarisht dje
nga Shtëpia e Bardhë. Miguel Diaz, 45 vjeçar, është bir i një kamerieri e një
punonjëse në një central telefoni, është profesor teologjie në Universitetin e Shën
Gjonit e në Kolegjin e Shën Benediktit në Minesota të Amerikës. Diaz, që flet anglisht,
spanjisht e italisht, ka lindur në Havanë. Botimet e tij kanë marr vlerësime të shumta
akademike, përfshirë edhe çmimin e librit të vitit nga ana e Seminarit Teologjik të
Princetonit. Ka qenë edhe president i Akademisë Teologjike të katolikëve të gjuhës
spanjolle në SHBA. Ambasadori i ri Amerikanë pranë Selisë së Shenjtë është
njohës i mirë i SHBA-së dhe i Kishës katolike, tha Nunci Apostolik në Amerikë, imzot
Sambi.