Benedikti XVI në audiencën e përgjithshme: bota ka nevojë për thjeshtësi e respektim
të rregullave, që të dalë nga varfëria e ta humanizojë punën.
(27.05.2009 RV)“Të thellohet bashkimi
i përsosur i Korpit të Krishtit e të mbrohet nga forcat, që e shtyjnë njeriun të vlerësojë
vetëm vetveten, gjë që shkatërron indin shoqëror e paqen e shpirtrave, çnjerëzon punën
e nuk e njeh solidaritetin me të varfërit. Të krishterët duhet ta përhapin në botë
frymën e thjeshtësisë e të dashurisë, për t’iu kundërvënë formave të ndryshme të egoizmit,
që e shkatërrojnë shoqërinë, duke e varfëruar botën”. Këto janë pohimet e guximshme
të Benediktit XVI në audiencën e sotme të përgjithshme, mbajtur në Sheshin e Shën
Pjetrit përballë 20 mijë besimtarëve e shtegtarëve, ardhur nga vise të ndryshme.
Katekizmi u frymëzua nga Shën Teodori Studita, murg që jetoi ndërmjet shekujve VIII-IX
e që shkriu gjithë jetën duke iu kundërvënë lëvizjes së ikonathyersve e duke fuqizuar
përkatësinë e krishterë të murgjërve të tij.
Përsëri një burrë i fortë, i fshehur
pas veshjes së përvujtë, zhgunit murgar, ishte protagonist i katekizmit të sotëm të
Benediktit XVI, i cili kohët e fundit vijon të thellohet në studimin e epokës bizantine,
ndërmjet shekullit VIII e IX, epokë e luftës kundër ikonoklastisë. Një burrë i formuar
e i informuar nga Feja, mësimet e të cilit u theksuan e u aktualizuan energjikisht
nga Papa, që bëri shpesh paralelizma historike ndërmjet periudhës së turbullt në të
cilën jetoi Shën Teodori Studita e trazirave analoge të mijëvjeçarit të tretë të krishterë: “Sot
ka rryma të shumta, që rrezikojnë bashkimin në fe e shtyjnë drejt një lloj individualizmi
të rrezikshëm shpirtëror e krenie shpirtërore. Është e nevojshme të impenjohemi në
mbrojtjen e në përpjekjen për ta rritur bashkimin e përkryer të Korpit të Krishtit,
në të cilin mund të ndërthuren në harmoni paqja e urdhërit e marrëdhëniet e sinqerta
personale në Shpirtin Shenjt”. Persekutimi ikonoklast, për shkak
të të cilit Shën Teodori Studita u burgos, u torturua e u internua vite me radhë,
lidhet ngushtë – tha Papa – me reformën e jetës murgare, të cilën murgu e vuri në
jetë me frymëzim të madh. Duke e ndjerë veten të fortë, sepse në gjirin e një bashkësie
tejet të madhe, me treqind murgjër, kur të tjerat mezi numëronin mesatarisht tridhjetë,
Shën Teodori nguli këmbë në nevojën e rendit e të nënshtrimit, përveç rreptësisë e
thellësisë së jetës së krishterë. E bëri këtë, për shembull, duke u ndaluar posaçërisht
tek kushti i varfërisë e duke na lënë trashëgim mësime, që vlejnë edhe sot e kësaj
dite: “Nuk duhet të varemi nga pasuria materiale, por duhet të mësojmë
flijimin, thjeshtësinë, rreptësinë e përkorjen. Vetëm kështu mund të zhvillohet një
shoqëri solidare e mund të kapërcehet problemi i madh i varfërisë në këtë botë”. Një
tundim tjetër, nga i cili Shën Teodori Studita u përpoq t’i mbronte murgjërit e tij,
të çmësuar të jetonin si një korp i vetëm, pas persekutimeve, që i kishin shpërndarë,
qe ai i përparësisë së vullnetit, në kuptimin që murgu duhet t’i kundërvinte egoizmit,
kushtin e bindjes. E kjo është e nevojshme edhe në një shoqëri si jona, e cila shpesh
herë i harron vlerat, që përbëjnë themelin e saj: “Në se njeriu ndjek vetëm
vetveten, indi shoqëror nuk mund të funksionojë. Vetëm duke mësuar të zëmë vendin
që na takon në lirinë e përbashkët, ta ndajmë së bashku e t’i nënshtrohemi asaj, të
mësojmë ligjshmërinë, dmth nënshtrimin e bindjen ndaj rregullave të së mirës së përbashkët
e të jetës së përbashkët, mund të shërohet shoqëria e edhe vetvetja nga mburrja, që
të shtyn ta vësh veten në qendër të botës”. Por përveç sundimit të vetvetes,
që nis nga bindja, për të arritur tek praktikimi i varfërisë dhe i pastërtisë, Benedikti
XVI theksoi edhe një virtyt tjetër, karakteristik për jetën e misionin e murgut
të lashtë të Bizantit: dashurinë për punën: “Ai, që është i zellshëm në impenjimet
materiale - argumenton murgu i lashtë- që punon me vullnet, është kështu edhe në impenjimet
shpirtërore. Prandaj nuk pranon që, me pretekstin e lutjes e të kundrimit, murgu të
largohet nga puna, edhe nga puna e dorës, e cila sipas tij e sipas gjithë traditës
murgare, është mjet për të gjetur Hyjin (…). E pikërisht kështu bota e punës humanizohet
e njeriu, përmes punës, ndjehet më pranë vetvetes e, sidomos, më pranë Zotit”. Përshëndetjet
dhe përmbledhja e katekizmit, shqiptuar sot në nëntë gjuhë të ndryshme të botës, e
përmbylli audiencën e përgjithshme, në përfundim të së cilës Papa, përveç grupeve
të ndryshme famullitare, iu drejtua posaçërisht anëtarëve të Fondacionit të Shën Mateut,
themeluar në kujtim të kardinalit Van Thuan, shoqëruar nga kardinali Renato Rafaele
Martino, kryetar i Këshillit Papnor Drejtësi e Paqe. Papa i ftoi ta përhapin doktrinën
shoqërore të Kishës e, posaçërisht, të impenjohen në veprimtari të tilla, që i bëjnë
njerëzit, materialisht e shpirtërisht të varfër, ta ndjejnë afërsinë e Kishës. Më
pas, duke u ndaluar me besimtarët në Shesh, Papa bisedoi për disa minuta me Margaret
Thatcher, ish-kryeministre britanike në vitet 1979-1990.