Të dielën, Papa do të kremtojë Meshën në Solemnitetin e Rrëshajëve. Magjisteri i Benediktit
XVI mbi Shpirtin Shenjt.
(26.05.2009 RV)Të dielën e ardhshme,
në orën 9.30, Papa Benedikti XVI do të kremtojë në Bazilikën e Vatikanit, Meshën e
Shenjtë në Solemnitetin e Rrëshajëve. Me këtë ngjarje të jashtëzakonshme, Shpirti
Shenjt kapërcen përçarjen e filluar në Kullën e Babelit, konfuzionin e zemrave dhe
hap horizontet, duke i afruar njerëzit me njëri-tjetrin. Në Magjisterin e tij, Benedikti
XVI nënvizon se Rrëshajët janë shenjë bashkimi dhe dashurie më e madhe se ndarjet
e shkaktuara nga njeriu. Më 15 maj 2005, Papa kremton për herë të parë Rrëshajët pas
zgjedhjes në fronin e Shën Pjetrit e paralajmëron: pa Shpirtin Shenjt, Kisha do të
reduktohej në një organizatë thjesht njerëzore, e rënduar nga strukturat e veta. Për
këtë arësye, ajo duhet të kujtojë gjithnjë si ka lindur, të ketë parasysh se si fryma
e flaka hynë pa pritur në Çenakull: “Kisha duhet të bëhet gjithnjë e sërish
ajo që në të vërtetë është: duhet t’ia hapë kufijtë popujve e të hedhë poshtë barrierat
ndërmjet klasave e racave. Në të nuk mund të ketë as të harruar, as të përbuzur… Fryma
e flaka e Shpirtit Shenjt duhet të hapin pa pushim ato kufij, që ne njerëzit vazhdojmë
t’i vendosim ndërmjet nesh: duhet gjithnjë e sërish të kalojmë nga Babeli, nga mbyllja
në vetvete, në Rrëshajët”. Pas një viti, Papa ndalet mbi domethënien e gjuhëve
të zjarrta, që zbritën mbi Shën Marinë e Apostujt, ndërsa luteshin: kjo ngjarje, pohon
Ati i Shenjtë më 4 qershor 2006, sanksionon shtrirjen e Paktit të lashtë të Zotit
me Izraelin për të gjithë popujt e tokës: “Shpirti Shenjt, me dhuratën e gjuhëve,
tregon se prania e tij e shndërron konfuzionin në bashkim. Krenaria dhe egoizmi i
njeriut krijojnë gjithnjë ndarje, ngrenë mure indiference, urrejtjeje e dhune. Shpirti
Shenjt, në të kundërt, i bën zemrat të afta të kuptojnë gjuhën e të gjithëve, pasi
rivendos urën e komunikimit të vërtetë ndërmjet Tokës e Qiellit. Shpirti Shenjt është
dashuri”. “Do të merrni fuqinë e Shpirtit Shenjt, i cili do të zbresë në ju
dhe do të bëheni dëshmitarët e mi”: ky rresht i Akteve të Apostujve u zgjodh nga Papa
si temë e Ditës Botërore të Rinisë në Sidnei. Të rinjve, që u mblodhën në Romë më
13 mars 2008, para së Dielës së Larit, Papa u flet për gëzimin që vjen nga hapja e
zemrës ndaj mëshirës së Zotit e ndaj Shpirtit të tij: “Bëhuni bartës të këtij
gëzimi, që vjen nga pranimi i dhuratave të Shpirtit Shenjt, duke dhënë me jetën tuaj
dëshminë e fryteve të Shpirtit: “dashuri, gëzim, paqe, durim, mirëkuptim, mirësi,
besnikëri, përvujtëri e zotërim i vetvetes” (Gal 5,22). Kujtohuni gjithnjë se jeni
“tempulli i Shpirtit”; lëreni Atë të banojë në ju e bindjuni me butësi, për të sjellë
kontributin tuaj në ndërtimin e Kishës e për të dalluar se për ç’vokacion iu ka thirrur
Zoti”. Dy muaj më vonë, më 11 maj, Papa përsërit: me Rrëshajët bëhet e qartë
se Kishës i përkasin shumë gjuhë e kultura të ndryshme. Megjithatë, tërheq vëmendjen
Ati i Shenjtë, Kisha Katolike nuk është federatë kishash, por një realitet i vetëm: “Me
Rrëshajët, Kisha themelohet jo nga vullneti njerëzor, por nga forca e Shpirtit të
Zotit. E menjëherë duket se si ky Shpirt i jep jetë një bashkësie, që është njëkohësisht
një e universale, duke kapërcyer mallkimin e Kullës së Babelit. Në fakt, vetëm Shpirti
Shenjt, që krijon bashkim në dashuri e në pranimin e ndërsjelltë të ndryshimeve, mund
ta çlirojë njerëzimin nga tundimi i vazhdueshëm i pushtetit tokësor, që dëshiron të
dominojë e të uniformojë gjithçka”.