Tel Aviv Tel Aviv-Jafa, është qendra më e madhe urbane, ekonomike e kulturore
në Izrael, me 360. 000 banorë, 1. 142 . 000 në qendrat qytetare të banimit, pothuajse
një e katërta e popullsisë izraelite. Jeta e qytetit nisi më 1950, kur Porti i lashtë
i Jafës u shkri me rrethinat hebraike të tij, të quajtura Tel Aviv (Kodra e Pranverës).
U rrit me shpejtësi nga ardhja e vazhdueshme e emigrantëve të rinj. Jafa njihet që
në epokën kananèe (shek XV para Krishti). U pushtua më parë nga egjiptianët e, më
pas, nga filistenjtë. Mbreti David e çliroi e i biri, Salomoni, nisi të mblidhte nga
porti, drurin e çedrit që fenikasit e lëshonin në ujë në Tir, për ndërtimin e Tempullit
të Jeruzalemit, Më pas u sulmua nga pushtues të panumërt: nga Aleksandri i Madh,
romakët, kryqtarët, mamelukët e otomanët. Në vitin 1948, kur u njoftua se do të krijohej
shteti i Izraelit, popullsia arabe e qytetit (65 mijë vetë, gjysma e banorëve) u largua
nga vendi, të cilin e zunë menjëherë emigrantët hebrenj, që gjetën një qytet gjysëm
të zbrazët. I ndërtuar mbi tri kodra, qyteti shtrihet sot në një hapësirë prej 10
kilometrash gjatë bregdetit mesdhetar, në qendër të vendit. Më se gjysma e instalimeve
industriale izraelite: industri tekstile, ushqimore, metalurgjike, elektronike, informatike,
e përpunimit të diamanteve etj. etj., ndodhen në zonën metropolitane të Tel Aviv-Jafës.
Tel Avivi është qendra kryesore e shtypit dhe e editorisë izraelite. Ishte porti i
dytë i rëndësishëm i vendit deri më 1965, kur u përurua porti i Ashdodit, 30 kilometra
më në jug. Universiteti i Tel Avivit u hap më 1956 ndërsa ateneu fetar i Bar-Ilan,
më 1953. Institute e shkolla të shumta teologjike e rabinike tërheqin studentë nga
të katër anët e botës. Në Tel Aviv e kanë selinë edhe Orkestra Simfonike dhe Teatri
Kombëtar i Operas.
Jeruzalemi “Yerushalaym” (themeluar nga Zoti Shalem,
në hebraishte “Al-Quds”: Vend i Shenjtë, emër arab, pas pushtimit islamik), ngrihet
770 metra mbi nivelin e detit Mesdhe e 1.165 metra mbi Detin e Vdekur. I shtrirë mbi
dy kodra, qyteti i lashtë, mbyllur brenda mureve të ndërtuara më 1542, ruan kujtime
të shenjta e monumente të rëndësishme të Besëlidhjes së Vjetër e të Re: Tempullin
e parë, Kullën e Davidit, Udhën e Dhimbshme të Kryqit, Kapelën që të kujton rrahjen
e Krishtit me kamzhik, Varrin e Shenjtë, Kishën e Fjetjes së Zojës së Bekuar, etj.
etj. Ndahet në katër lagje kryesore: lagjja hebraike, ajo e krishterë, armene e islamike.
Lagjja hebraike (juglindje) shtrihet në Qytetin e Epërm të kohës së Herodit; atje
mund të soditet Kulla izraelite dhe Muri Perëndimor (i njohur si ‘Muri i Lotëve’). Lagjja
e krishterë zë pjesën perëndimore të qytetit. Ndërmjet monumenteve më të rëndësishme,
kujtojmë Bazilikën e Varrit të Shenjtë, Kishën e Shën Gjon Pagëzuesit dhe Kishën e
Shën Veronikës, gjatë Udhës së Kryqit. Lagjja islamike, më e madhja e qytetit,
përfshin shumë vende të shenjta të krishtera: Udhën e Kryqit, Kuvendin e rrahjes me
kamzhik, Kishën e Shën Anës, Kapelën e ‘Ecce Homo’ dhe Sheshin e Xhamive (Kupola e
Shkëmbit, vendi i tretë i shenjtë i islamit e Xhamia Al-Aksa). Së fundi, lagjja
armene, në pjesën më jugore të mureve, e banuar pothuajse krejtësisht nga armenët,
që duhet të kenë ardhur këtu aty nga shekulli I. Aty ndodhet Selia e Patriarkanës
armeno-ortodokse, një nga tri Rojtaritë e Tokës Shenjte (së bashku me Patriarkanën
greko-ortodokse e Rojtarinë e fretërve të vegjël), juridiksioni i të cilave shtrihet
mbi të gjithë Tokën Shenjte e edhe mbi Jordaninë. Katedralja e Patriarkanës, kushtuar
Shën Jakut, është ndërtuar mbi themelet e shtëpisë së Apostullit, i pari ipeshkëv
i Jeruzalemit. Qyteti i lashtë ka shtatë porta: Bab Al-Khali (Porta e Jafës), Bab
An-Nabi Daud (Porta e Davidit), Bab Al-Mugharba (Porta e Mugrabinëve), Bab Sitti Mariam
(Porta e Luanëve ose e Zojës së Bekuar), Bab Az-Zahira (Porta e Herodit) e Bab Al-Xhadid
(Porta e Re). Udhët brenda mureve janë të ngushta e të pjerrëta, nganjëherë me
pjerrtësi tepër të madhe ose me këmbë të gjëra shkallësh; të shpeshta rruginat e qemeret
. Qyteti i ri është i kthyer nga ana e Ramallahut në veri, nga Betlehemi në jug,
depërton në shkretëtirë, në lindje; në viset e Shefelah, në perëndim. Ka gjysëm milion
banorë, nga të cilët ¼ janë arabë (myslimanë e të krishterë). Me rëndësi, prania
e katolikëve në Jeruzalem, me Delegacionin Apostolik në Malin e Ullinjve, Patriarkatin
Latin, Rojtarinë e Tokës Shenjte dhe Kishën e të Shëlbuemit (kishë famullitare e latinëve
të Jeruzalemit), Vikariatet Patriarkale greko-katolike, siro-katolike e maronite,
Vikariatin armeno-katolik e kaldeo-katolik, Shkollat Biblike dhe Arkeologjike Franceze(1890),
Studium Biblicum Franciscanum (1927), Shkollën amerikane për kërkime shkencore lindore,
Istitutin Papnor Biblik, Qendrën Kristiane të Informacionit (që përfshin edhe Zyrën
françeskane të shtegtimeve) si dhe institute të tjera fetare, arsimore e shoqërore.
Memoriali
i Yad Vashem Është monumenti përkujtimor i Holokaustit, shfarosjes masive
të hebrenjve nga nazistët. Yad Vashem do të thotë: ‘Një përkujtim e një
emër”. Vendimin për ndërtimin e tij e mori Parlamenti Izraelit (Knesset) në
vitin 1953. Ndërtesa ka Sallën përkujtimore, Muzeun historik, Galerinë e artit, Sallën
e emrave, Arkivin, Luginën e bashkësive të humbura, Qendrën edukative dhe Kopshtin
e famshëm të të Drejtëve ndërmjet kombeve, për nder të njerëzve nga të gjitha kombet
e fetë, që vunë në rrezik jetën e tyre për të shpëtuar hebrenjtë nga shfarosja. Memoriali
ngrihet pranë Malit Herzl, në Majën e Har Hazikaron (Mali i Kujtimit). Mbrenda është
‘Hall of Remembrance”, një strukturë në formë çadre, që përkujton vrasjen e 6 milionë
hebrenjve, shpesh bashkësi të tëra hebraike të zhdukura. Këtu, para një flake, që
nuk shuhet kurrë, janë shkruar emrat e njëzet e dy kampeve të përqendrimit e ruhen
disa nga urnat me hirin e viktimave të furrave krematore. Ndërsa në Arkivin Qendror
të Holokaustit e të Heroizmit, ruhen 50 milionë dokumente mbi shfarosjen në masë të
hebrenjve. Papa Gjon Pali II e vizitoi këtë vend më 23 mars të vitit 2000. Po
ju njohim me tekstin e identifikimit të viktimave, që u lexua gjatë vizitës:
“Duke
lartuar flakën, që digjet në përjetësi, në këtë Memorial, para hirit
të shenjtë të vëllezërve tanë, një me ta e ndjejmë veten një
me kujtimine tyre; me 6 milionë bij prej popullit tonë që
pësuan martirizimin e vdiqën nga dora e nazistëve dhe e bashkëpunëtorëve
të tyre, së bashku me grupe të vogla e të mëdha hebraike, të
shkatërruara me synimin e ultë për të shlyer emrin e kulturën e Izraelit
në botë. Me druajtje të shenjtë kujtojmë forcën e shpirtit të
vëllezërve tanë, madhështinë, guximin e luftëtarëve që ndër geto
ndezën flakën e kryengritjes, duke shpëtuar nderin E
dinjitetin e popullit hebre; kujtojmë luftën krenare e sublime të
Kombit tonë për të shpëtuar trashëgiminë e etërve e fytyrën njerëzore
të bijve. Kujtojmë, së fundi, ‘ të Drejtit e Kombeve’ që
vunë në rrezik jetën e tyre për të shpëtuar atë të hebrenjve”. E,
në përfundim të vizitës në Yad Vashem, Benedikti XVI shkroi në librin e vizitorëve
këtë frazë:“‘His mercies are not spent’ (“Fara e tyre nuk u shua”), shkëputur
nga Libri i Vajtimeve (Vaj 3-22): Poshtë, nënshkrimi: Benedictus PP. XVI”.
Instituti papnor “Zoja e Qendrës së Jeruzalemit” Etërit francezë augustinianë
të të Ngjiturit të Zojës në Qiell (asuncionistë) filluan në vitin 1884 ndërtimin e
Qendrës “Zoja e Bekuar e Francës”, që të ndihmonin shtegtarët francezë në Tokën Shenjte.
Terreni prej 4 mijë metrash katrore u pat blerë nga konti i Pielasë dhe dhurimet e
paratë e besimtarëve e të shtegtarëve bënë të mundur që të ndërtohej një strehë për
ta në vitin 1888. Gjatë Kongresit Eukaristik Botëror të Jeruzalemit (1893) u vendos
guri i parë i kapelës dhe ndërtesa përfundoi në vitin 1904. Gjatë konfliktit të parë
arabo-izraelit, në vitin 1948, ndërtesa u dëmtua seriozisht nga shpërthimi i dy minave
dhe u bë pikë vëzhgimi izraelite në linjën “no man’s land”; ana e kundërt dhe shtëpitë
e oborrit u kthyen në strehë për izraelitët pa shtëpi. Shtegtarët ishin të paktë e
për të përballuar shpenzimet, asuncionistët shitën pronën. Në vitin 1973, Papa Pali
VI vendosi shndërrimin në Qendër Ndërkombëtare të Selisë së Shenjtë në favor të shtegtarëve,
duke e zgjeruar edhe me seksione për promovimin kulturor dhe profesional. Gjon Pali
II e ktheu Qendrën në Institut papnor me emrin “Zoja e Qendrës së Jeruzalemit”, më
13 dhjetor 1978(Statuti u miratua më 2 shkurt 1981). Qendra konsiderohet “vend i shenjtë
ekumenik” dhe është prelaturë territoriale, ku prelati është Delegati Apostolik në
Jeruzalem dhe në Palestinë. Qendra disponon 144 dhoma, 2 salla për mbledhje dhe një
auditorium me 500 vende, ku u mbajt sot takimi me organizatat për dialogun ndërfetar.
Administrimi i Institutit, që gëzon të drejta extra-territoriale, i është besuar nga
Papa Gjon Pali II Legjionarëve të Krishtit, përmes Motu Proprio “Në Vazhdim” (26 nëntor
2004). Prelati territorial është Nunci apostolik në Izrael, imzot Antonio Franko.
I ngarkuari i Selisë së Shenjtë për Qendrën është atë Solana Rivera Huan Maria, i
Legjionarëve të Krishtit, i cili është edhe Atashe Kulturor pranë Delegacionit Apostolik
në Jeruzalem dhe Palestinë (www.notredamecenter.org).
Instituti i ri
“Notre Dame” i Magdalës ka qëllim ta shtrijë misionin e Qendrës së Jeruzalemit
edhe në Galile, në pjesën veriore të Izraelit. Projekti do të realizohet në një terren
prej 4,3 hektarësh, blerë me ofertat e mijëra besimtarëve, në vendin ku lindi Maria
Magdalena, në brigjet e Liqenit të Galilesë. Do të shërbejë si strukturë për pritjen
e shtegtarëve dhe si qendër shpirtërore sëbashku me Bazilikën e ardhshme të Shën Maria
Magdalenës.
12 maj Mbi Sheshin e Xhamive të Jeruzalemit Sheshi i Xhamive, i njohur edhe si Al-Hàram Ash-Sharìf (rrethimi fisnik i shenjtë,
në arabisht) është një rrafshinë artificiale në formë trapezi (gjatësia 462-491 m,
gjerësia 281-310 m), që zë një të gjashtën e sipërfaqes së Qytetit të Vjetër. Zona
është tri herë e shenjtë: hebrenjtë e mbajnë si vendin e episodit të Abrahamit e të
Isakut dhe si vendin e Tempullit të Salomonit; myslimanët e konsiderojnë si vendi
i tretë i shtegtimeve, pas Mekës dhe Medinës; së fundi, për të krishterët është vendi
i profecisë së Krishtit për shkatërrimin e Tempullit të Jeruzalemit. Në shesh ngrihen
dy xhami të mëdha (Kupola e Shkëmbit dhe Xhamia Al-Aksa) me vende të tjera të shenjta
me minare, shatërvane e galeri. Tek sheshi mund të arrihet përmes tetë shkallëve,
në majë të të cilave ndodhen harqe që quhen Mauazìn (peshore në arabisht): aty, sipas
fesë islamike, do të varen peshoret për të matur shpirtrat, ditën e Gjykimit të Mbramë.
Kupola
e Shkëmbit (Qubbet As Sakhra, në arabisht) është monumenti më i lashtë islamik
në Tokën Shenjte. Xhamia e parë, e ndërtuar në vitin 640, u zëvendësua në vitin 687
nga vendi aktual i kultit, me bukuri të pakrahasueshme. Në shekullin XII shndërrohet
nga kryqtarët në kishë me emrin Templum Domini, e prej këndej e ka origjinën urdhëri
kavaleresk i Templarëve. Tempulli i kthehet kultit mysliman me Salahedinin, në vitin
1187. Ndërtesa është tetëkëndëshe; të gjitha anët kanë dekorime të çmuara, pjesa e
fundit në mermer shumëngjyrësh, maja me pllaka majolike arabeske. Materiali i ndërtimit
vjen nga shtëpi e kisha të mëparshme, bizantine dhe romake. Brenda, xhamia është e
pasur me piktura e fraza të Kuranit, shkruar me ar, pas pasqyrime të natyrës, pasi
Islami është ikonathyerës. Dyshemeje, me pllaka meremeri, mbulhet nga tapete të çmuara
persiane. Në qendër të ndërtesës ngrihet Shkëmbi i Shenjtë, mbi të cilin është lutur
Muhameti para se të ndërmerrte udhëtimin e tij drejt Qiellit, e mbi të cilin do të
bien trumpetat në Ditën e Gjykimit të Mbramë. Kupola që mbulon Shkëmbin nga sipër
mbahet nga 12 kolona të gjata, prej mermeri shumëngjyrësh. E formuar nga dy qemerë
druri të vendosura njëra mbi tjetrën, kupola është e veshur nga jashtë me alumin të
larë me ar. U la me ar në vitet ’90 nga mreti jordanez hussein. Brenda, tavani është
i veshur krejtësisht me një mozaik me sfond të artë.
Xhamia Al-Aksa (më e largëta, në arabisht), sipas traditës myslimane, është vendi më i largët
nga Meka, në të cilin është transportuar Muhameti gjatë Natës së Kadrit (të fatit).
Ndërtesa është e fillimit të shekullit VIII; shkatërruar krejtësisht nga tre tërmete,
bëhet seli i Templarëve për t’u kthyer në kultin islamik me Salahedinin. U rindërtuar
dhe i rizbukurua shpesh, sidomos gjatë pushtimit otoman. Gjatë restaurimit të fundit,
në vitin 1938, mbreti faruk i Egjiptit bëri një tavan të ri dhe Musolini i Italisë
dhuroi kolonat prej mermerit të famshëm të Karrarës. Në vitin 1966 u restaurua kupola,
me zëvendësimin e mbulesës prej plumbi me fleta alumini. Mbi Shesh ndodhet edhe një
Muze Islamik, që ruan dorëshkrime interesante, ndërmjet të cilave spikat një Kuran
i epokës së mamelukëve (shekulli XIII). “Muri i Lotëve” në Jeruzalem Muri
Perëndimor (në gjuhën hebraike : הכותל המערבי HaKotel HaMa'aravi), ose thjeshtë Kotel,
është mur rrethues i Tempullit të parë të Jeruzalemit, i ruajtur deri në ditë tona.
Njihet edhe si ‘Muri i Lotëve” ose si ‘Muri al-Buraq’. Tempulli ishte ndërtesa më
e shenjtë e hebraizmit. Herodi i Madh ndërtoi mure të forta rreth Malit Moriah, duke
e zgjeruar sheshin e vogël mbi të cilin qenë ndërtuar si Tempulli i parë, ashtu edhe
i dyti, në majën e Malit të Tempullit. Tempulli i parë, ai i Salomonit, i ndërtuar
rreth shekullit X para Krishtit, u shkatërrua nga babilonezët në vitin 586, gjithnjë
para Krishtit. Tempulli i dytë u rrënua nga Perandoria romake në vitin 70 pas Krishtit,
si rezultat i luftës judaiko-romake. Që të dy qëndruan në këmbë për një periudhë prej
400 vjetësh. Sipas gojëdhënës, kur legjionet e Titit e dërmuan Tempullin, muri
rrethues perëndimor i oborrit të brendshëm mbeti në këmbë, pjesërisht i dukshëm e
pjesërisht i mbuluar nga rrënojat e mureve të tjera. Thuhet se Titi e la në këmbë,
si relikt tragjik, që do t’u kujtonte hebrenjve në shekuj shpartallimin nga Romakët.
Ndërsa hebrenjtë e shikojnë këtë pjesë të murit si simbol i premtimit të Zotit për
t’i lënë në këmbë disa pjesë të shenjta të Tempullit, në kujtim të besëlidhjes së
pathyeshme me popullin hebraik, pavarësisht nga gjëma që i ra mbi kokë. Hebrenjtë
luten këtu që prej dymijë vjetësh, duke i parë rrënojat e lashta si vendin më të shenjtë
mbi faqe të dheut. E jo më pak të krishterët, feja e të cilëve lidhet ngushtë
me Besëlidhjen e Vjetër, e edhe myslimanët, që e mbajnë Salomonin si Profetin e tyre.
E po këtu lindën tradita të shumta, ndër të cilat, zakoni për të vënë ndërmjet
plasave të gurëve viganë copa të vogla letrash me lutje të zjarrta drejtuar Zotit
për rikthimin e të gjithë hebrenjve mërgimtarë në dheun e Izraelit, për rindërtimin
e Tempullit (të tretë), për ardhjen e epokës mesianike e, me të, të mesisë (hebrarisht
Mashiach) së hebrenjve.
Çenakulli Është selia e parë e Kishës në
fasha, vend ku u themelua sakramenti i Shugurimit meshtarak, sakramenti i Eukaristisë
e ai i Rrëfimit, apo i pajtimit me Zotin. Fjala latine ‘Coenaculum’ tregonte ‘vendin
ku hahej darka’, por, në kuptim më të përgjithshëm, edhe katin e epërm, pjesën e shtëpisë
të caktuar për miqtë, apo ‘dhomën e miqve’. Tradita e krishterë mbi vërtetësinë e
Çenakullit, është shumë e lashtë. Nis që nga fundi i shekullit II. Në shekullin IV
pranë Çenakullit u ndërtua Kisha e re e ‘Sionit të Shenjtë’. E shkatërruar nga persianët
në vitin 614, e rindërtuar, e shkatërruar rishtas nga myslimanët, ishte në rrënim
e sipër, me përjashtim të kapelës me dy kate të Çenakullit, kur këtu erdhën kryqtarët.
Pas ardhjes së tyre, në këtë vend u ndërtua një bazilikë me tri navata e cila, përveç
Sallës së epërme të miqve (Kapela e Çenakullit) përfshinte edhe vendin e ‘Fjetjes
së Marisë’ si dhe një kapelë tjetër, në kujtim të ‘Larjes së këmbëve’. Në vitin
1187, ndonëse Jeruzalemi ra në dorë të Saladinit, shtegtarët lejoheshin të hynin në
këtë vend të shenjtë e meshtarët, të kremtonin Meshën shenjte për shtegtarët. Bazilika
e Kryqtarëve, e braktisur, ishte pothuajse rrafsh me tokë, kur më 1335 arritën françeskanët.
Mbreti Roberti i Napolit dhe mbretëresha Sançia, pasi paguan një shumë të madhe të
hollash, e bindën Sulltanin e Egjiptit t’ua dhuronte Çenakullin françeskanëve. Fretërit
thirrën menjëherë disa artistë qipriotë për ta ringritur në këmbë vendin e shenjtë
me dy kate, ashtu siç ishte në zanafillë. U ndërtua edhe një kuvend françeskan për
rregulltarët, që do të kryenin edhe detyrën e famullitarëve për Çenakullin dhe për
të gjitha viset e shenjta të Jeruzalemit të Betlehemit. Që asokohe eprori i Rojtarisë
së Tokës Shenjte ka titullin “ Rojtar i Malit të Sionit”. Në vitin 1524 myslimanët
i përvetësuan sallat poshtë Çenakullit, me pretendimin se aty ishte ‘Varri i Profetit
David”. Pas një dekreti otoman, françeskanët u detyruan ta dorëzojnë edhe Sallën e
Epërme e, më në fund, të largoheshin fare nga kuvendi. Salla e Epërme, dmth Çenakulli,
u kthye në Xhami, ku të krishterët nuk kishin të drejtë të shkelnin. Në Sallën
e epërme të Çenakullit (15.30 x 9,40), e cila në shekullin XIV u rindërtua me stil
gotik, me harqe e qemere të larta, shihet shkalla që shërbente për t’u ngjitur nga
kati poshtë, në atë të sipërmin si dhe një shkallë me tetë këmbë, që të çon tek kapela
e shuguruar për kujtim të zbritjes së Shpirtit Shenjt ditën e Rrëshajëve. I dukshëm
edhe ‘mi’ rab’, ndërtuar në vitin 1929 për t’u treguar myslimanëve drejtimin e Mekës.
Pali VI u lut në Çenakull më 5 janar 1946; e Gjon Pali II kremtoi këtu Meshën
më 23 mars të vitit 2000. Sot ndërtesa është pronë e Shtetit të Izraelit. Në
Katin poshtë, që përkon me Kapelën kushtuar kujtimit të ‘Larjes së këmbëve’, sot kthyer
në sinagogë, është Varri monumental i Davidit, cak shtegtimesh kombëtare hebraike.
Përmes kiostrit të dikurshëm të kuvendit françeskan, ngritur më 1335, mund të hyhet
në Muzeun e Shoah (fjalë që në gjuhën hebraike do të thotë shfarosje), ku ruhen kujtime
të viktimave që gjetën vdekjen në kampet naziste të shfarosjes së hebrenjve.
Rojtaria
e Tokës Shenjte e Fretërve të Vegjël u themelua në vitin 1217. Në vitin 1291,
pasi ra Mbretëria Latine e Jeruzalemit, kuvendet e Sirisë e të Palestinës u shkatërruan
nga saraçenët, bashkësitë e ritit lindor i përzunë nga rajoni dhe shumë rregulltarë
u vranë. Në vitin 1333, mbretërit e Napolit, Roberti dhe e shoqja Sança, blenë nga
Sulltani i Stambollit (Kostandinopoja e dikurshme) disa vende të Shenjta dhe ia besuan
ruajtjen e tyre Urdhërit të Fretërve të vegjël. Kjo u konfirmua nga Papa Klementi
VI me një Letër Apostolike të 21 nëntorit 1342. Fretërit e Vegjël u lejuan të qëndronin
si përfaqësues të katolikëve në Rojtarinë e Vendeve të Shenjta, pranë Çenakullit.
Të dëbuar nga Shenjtërorja, në mesin e shekullit XVI, Fretërit e Vegjël, pas ndërhyrjes
së Republikës së Venedikut, mundën të blinin nga murgjërit gjeorgjianë kuvendin, që
quhet “i Kolonës”, kuvendi aktual i Shëlbuesit të Shenjtë. Përveç pushtetit të Eprorit,
Rojtari kishte jurisdiksion mbi klerin e mbi popullin e Jeruzalemit, deri në vendosjen
e Patriarkatit Latin (Letra Apostolike “Nulla celebrior”, 23 korrik 1847). Rojtari
i Tokës Shenjte, që e ka selinë në kuvendin e Shëlbuesit të Shenjtë që nga viti 1558,
ndihmohet nga një Vikar e nga gjashtë Diskretë (këshilltarë), të cilët u takojnë grupimeve
të ndryshme gjuhësore (francez, anglez, italian, lindor, spanjoll, sllavo-gjerman).
Ai ka gjithashtu privilegjin e shenjave ipeshkvnore dhe e shtrin juridiksionin mbi
të gjitha kuvendet françeskane të rajonit (Jordania, Izraeli, Libani, Qipro, Egjipti
dhe Rodi). Rojtari aktual i Tokës Shenjte është atë Pierbatista Picabala (www.custodia.org).
Patriarkati
Latin i Jeruzalemit Kisha e Jeruzalemit u ngrit në seli patriarkale
me Koncilin e Kalçedonisë (541). Me ardhjen e Islamit, bashkësia e krishterë u zvogëlua
dalëngadalë dhe Patriarkati, i dobësuar, i kërkoi mbështetje Kishës më të fuqishme
të Kostandinopojës. Kur Bizanci, në gjysmën e parë të shekullit XI, kaloi përfundimisht
me skizmatikët, edhe Kisha e Jeruzalemit e ndoqi pas. Kur kryqtarët hynë në Jeruzalem,
në vitin 1099, gjetën një seli patriarkale vakante, pas vdekjes së Patrikut grek Simeon,
në Qipro ku ishte strehuar. Atëherë u emërua Arnuli, Patriku i parë latin. Patrikët
latinë ndoqën njëri-tjetrin në Jeruzalm deri në vitin 1187, më pas u transferuan në
Akri deri në rënien e qytetit në vitin 1291. Nga ajo datë, Selia patriarkale u bë
titullare, deri në rivendosjen si Seli rezidenciale nga Piu IX (Nulla celebrior, 23
korrik 1847). Më 17 prill 1848, Patriku Xhuzepe Valerga hyri në formë solemne në Varrin
e Krishtit, Katedrale e Patrikëve të Jeruzalemit. Që nga ajo ditë janë ulur në atë
fron gjashtë Patrikë të tjerë: Imzot Vinçenc Brako (1873-1889), Imzot Luigj Piavi,
ofm (1889-1905), imzot Filip Kamasei (1907-1919), imzot Luigj Barlasina (1920-1947),
Imzot Albert Gori, ofm (1949-1970), imzot Xhakomo Beltriti (1970-1987), Imzot Mishel
Sabah, emëruar nga Papa Gjon Pali II dhe shuguruar prej tij në Bazilikën e Shën Pjetrit
më 6 janar 1988. Patriku aktual është Fuad Tual, që nga 21 qershori 2008.
Lugina
e Kedrave ose e Jozafatit. Në Jeruzalem natyrisht nuk mungojnë Kishat: janë
shumë madje, por asnjëra prej tyre nuk ka hapësirën e duhur për t’i hapur krahët të
gjithë besimtarëve që dëshironin të merrnin pjesë në Meshën e Papës në shtegtim. Papa
Gjon Pali II pati kremtuar dy Meshë në Qytetin e Shenjtë: një mbi Varrin e Krishtit,
përballë një turme të vogël, aq sa zinte vendi i kufizuar; e një tjetër, private,
në Çenakull, duke gëzuar kështu një privilegj të pashoq, po të kemi parasysh se vendi
ku u themeluan Eukaristia e Meshtaria, nuk është më kishë, por kapelë në të cilën,
pasi u dëbuan françeskanët më 1551, lejohet vetëm lutja private. Prandaj as Pali
VI nuk e kremtoi këtu Eukaristinë. Kisha katolike më e madhe është Bazilika e Kombeve,
që njihet edhe si Bazilika e Gjetsemanit: zë 800 vetë. E pamjaftueshme, pra, për turmën
që pritej të marrë pjesë në Meshën e Benediktit XVI. U propozua, atëherë, që Mesha
të kremtohet nën qiell të hapur e për këtë qëllim françeskanët vunë në dispozicion
një truall që e patën blerë rreth vitit 1666, i cili në kohë të Krishtit ka shumë
mundësi të ketë qenë ngjitur me Kopshtin e Ullinjve. Tani i ndan vetëm rruga që kalon
përmjet. Mesha, pra, u kremtua në sheshin pranë Kopshtit të Gjetsemanit, ku ishin
të pranishëm 5000 vetë. Nga tre vendet e zgjedhura për meshët e Benediktit XVI,
ky ishte, pa dyshim, më i përshtatshmi, sepse krijoi mundësinë për të ecur drejtpërdrejtë
në gjurmët e Krishtit. Nuk dihet me siguri në se Krishti u kthye, kur u rrit, në
vendlindje, në Betlehem, por është më se e sigurt se shkeli shumë herë në këto shtigje,
që ngjiten drejt Malit të Ullinjve e Tempullit të Jeruzalemit. Ndonëse nuk e ka
hapësirën e dikurshme, ky vend u ofroi shtegtarëve një panoramë që të mahnit jo vetëm
me bukurinë e saj natyrore, por edhe me pasurinë e Historisë së saj të Shenjtë. Sapo
hyn në Luginën e Kedrave, e quajtur edhe e Jozafatit, shtegtari gjindet menjëherë
në udhëkryq ndërmjet dy Besëlidhjeve. E kjo, sepse Jezusi ishte besimtar hebre praktikant,
që shkonte rregullisht në Tempull, duke nderuar festat e shtegtimet e duke hyrë në
dialog me rabinët, siç vijojnë të bëjnë akoma sot e kësaj dite, ata që studiojnë
në shkollat talmudike. Jezusi u ndesh me klerin e epokës, pikërisht sepse hapi
një rrymë të re të judaizmit. E pikërisht sepse e donte Jeruzalemin, u ngjit në shtigjet
e Malit të Ullinjve, për ta kundruar e për të lotuar mbi të. Kur ngjitet atje ku
u ngjit shpesh Jezusi, e shikon djathtas, drejt perëndimit, shtegtari vëren shtegun
prej nga pritej të hyjë Mesia në Jeruzalem. E, sipas traditës së krishterë, pikërisht
këtu Joakimi takoi Anën. Nga bashkimi i tyre lindi Virgjëra Mari. E po prej këtu
duhet të ketë hyrë Jezusi në Jeruzalem të Dielën e Larit. Duke shikuar drejt
jugut, shtegtari mund të kundrojë pinaklin, siç quhet maja më e lartë e Tempullit,
ku djalli tundoi Jezusin. Duke vijuar t’i shëtisë sytë nga jugu, shtegtari mund
të soditë, ndërmjet dy ullinjve, Varrin e Absalonit, pranë atij të Zakarisë e varrin,
që njihet me emrin “i së bijës së faraonit”, pranë e pranë njëri–tjetrit. Janë monumentet
e kësaj zone që Jezusi i ka parë me sytë e tij e që janë ruajtur të paprekur deri
në ditët tona. Kujtojmë se i përkasin shekujve II e I para Krishtit. Në se i kthen
sytë majtas, nga lindja, mund të soditësh Malin e Ullinjve, me varrezën e hebrenjve,
Dominus Flevi, ku përkujtohet edhe sot vaji i Jezusit mbi Jeruzalem, kishën ruse të
Marisë Magdalenë me kupolat e saj të praruara në formë qepujke; Bazilikën e Kombeve
dhe fasadën e Portës së Artë, pranë së cilës, drunjtë mijëravjeçarë të ullinjve. Duke
i kthyer sytë nga veri-lindja, mund të shikosh varrin e Virgjërës; në veri-perëndim,
kuvendin greko-ortodoks ku nderohet skaji i rrugës, ku u mbyt me gurë i pari martir
i krishtërimit, Shën Shtjefni. Ky vend përmbledh një mori ngjarjesh të historisë
biblike, në një hapësirë që ka mbetur ashtu siç ishte prej mijëra vjetësh. Është e
do të mbetet, edhe për Meshën e Papës, i mbjellur me ullinj, duke krijuar një kënd
vërtetë baritor, që të kujton menjëherë Bariun e Mirë. Këtu mund të kundrosh edhe
disa varre. Është varreza e famullisë latine, ku françeskanët varrosin të vdekurit
e kësaj famullie. Puna më e rëndësishme ishte ndërtimi i tribunës, ku Benedikti
XVI bashkëkremtoi Meshën me më se njëqind meshtarë, realizuar nga një shoqatë e specializuar
izraelite. Duke ndjekur këtë intinerar, Papa mundi të admirojë muret e Qytetit
Shenjt, duke shkelur drejtpërdrejt mbi gjurmët e Krishtit! Ngjarje e jashtëzakonshme!