З 20 траўня па 17 чэрвеня ў Беларусі пройдуць Дні культуры Швэцыі. Сёлета культурныя
мерапрыемствы будуць праводзіцца па трох напрамках: літаратура, музыка й кіно. Адкрые
Дні культуры прэзэнтацыя першай беларускамоўнай кнігі журналіста й перакладчыка, дырэктара
Беларускай службы швэдзкага радыё Дзьмітрыя Плакса “Трыццаць тэкстаў”. У Менску, Пінску
й Баранавічах адбудуцца літаратурна-музычныя вечарыны з удзелам сучасных швэдзкіх
і беларускіх пісьменьнікаў. У Менску выступяць зоркі скандынаўскага фры-джызу, у рамках
Дзён пройдзе фэстываль сучаснага швэдзкага кіно. Дні культуры Швэцыі пройдуць
у Беларусі ўжо восьмы раз. Арганізатарамі гэтага мерапрыемства выступіла Амбасада
Швэцыі ў Менску пры падтрымцы Швэдзкага інстытуту й Дзяржаўнай рады культуры Швэцыі
сумесна зь беларускімі партнэрамі.