Kardinali Toran në Aman për t’u takuar me botën myslimane.
(18.05.2009 RV)Kardinali Toran në Aman për t’u takuar me botën myslimane. Filluan
dje në Aman të Jordanisë, bisedimet e organizuara nga Instituti mbretëror i studimeve
fetare (Royal Institute for Inter-Faith Studies) dhe Këshilli Papnor për dialogun
ndërfetar. Delegacioni i Selisë së Shenjtë kryesohet nga kardinali Zhan-Lui Toran.
Takimi i rëndësishëm, i përqendruar tek tema “Feja dhe shoqëria civile” në fillim
u ndalua tek një panoramikë e përgjithshme kushtuar shoqërisë e kulturës myslimane
e asaj të krishterë. Më pas pjesëmarrësit në takim do të shkëmbejnë mendime mbi lidhjet
ndërmjet historisë së feve, shoqërisë civile e mendimit filozofik. Më pas do të flitet
për fenë e shoqërinë civile në botën moderne e në traditat e ndryshme fetare. Nesër
në përfundim të bisedimeve, parashikohet botimi i një komunikate të përbashkët.