(17.05.2009 RV)Sot, e dielë, më
17 maj, Kisha katolike kremtoi të Dielën VI të Pashkëve; po sot kalendari liturgjik
i Kishës na fton të bashkojmë zërin në thirrjen: ‘Shëlbimi yt, o Zot, u përket të
gjithë popujve!” Është edhe festa e Shën Vitorit martir dhe e Shën Pashk Bajlonit,
lajk françeskan, pajtor i shoqatave eukaristike.
Nesër, e hënë më 18 maj,
sipas kalendarit kishtar bie festa e Shën Gjonit I, papë e martir. Liturgjia na nxit
të meditojmë mbi jetën e njeriut, që kalon shumë çaste të gëzuara, por jo më pak edhe
të trishtuara e na fton që, të sigurtë në premtimin e të Ngjallurit, t’i shikojmë
vuajtjet tokësore si prelud i galdimit të ringjalljes. Jezusi i ngjallur kthehet tek
Ati, pasi na ka hapur edhe ne portën për të hyrë te Hyji. Tani e dimë se duke e lutur
Atin në emër të Birit, fitojmë gjithçka është e nevojshme për shëlbimin tonë.
Të
martën më 19 maj, kalendari kishtar përkujton Shën Çelestinin V, papë e Shën Urbanin
I papë, si edhe Shenjtorët Parteni e Kallugjeri, martirë, Shën Ivon meshtar dhe Shën
Krispinin nga Viterbo, rregulltar kapuçin.
Të mërkurën e ardhshme më 20
maj, kalendari kishtar do të përkujtojë Shën Bernardinin e Sienës, françeskan e Shën
Aureën, martire nga Ostia afër Romës.
Të enjten më 21 maj bie festa e të
Ngjiturit të Jezu Krishtit në Qiell. Do të kremtohet festa e Shën Kristoforit Magalanes
me shokët e tij meshtarë, martirë në Meksikë dhe e Shën Eugjenit de Mazenod, ipeshkëv
i Marsejës, themelues i Oblatëve të Marisë. Këta na mësojnë se nuk mjafton ta shpjegojmë
fenë tonë: feja duhet jetuar çdo ditë, duke ecur me vullnet krejtësisht të lirë në
gjurmët e Zotit, që na çojnë në Mbretërinë e amshuar.
Liturgjia e së premtes,
më 22 maj, na kujton se për të parashijuar jetën e amshuar, duke qenë akoma në botë,
duhet të njohim thellësisht të vetmin Zot të vërtetë dhe Birin e Tij të mishëruar,
të cilin Ati e dërgoi mes nesh. Është festa e Shën Ritës nga Kasha, rregulltare agostiniane,
pajtore e njerëzve të pashpresë, së cilës Zoti i dhuroi dijen e forcën e Kryqit dhe
e shën Julies, virgjër e martire.
“Fuqia e Zotit është dashuria!”. Këtë
na kujton Shën Gjon Baptist de Rosi, meshtar romak, që do të përkujtohet të shtunën
e ardhshme më 23 maj.
Liturgjia e së dielës së ardhshme, më 24 maj, i
kushtohet të dielës së VII të Pashkëve e në shumë vende si në trevat shqiptare, do
të kremtohet solemniteti i festës së të Ngjiturit të Jezu Krishtit në Qiell, apo festa
e ‘Të Shëlbuemit’. Liturgjia na kujton se feja e besimtarëve rritet në bashkim të
ngushtë me transmetimin e pandërprerë të Fjalës së Krishtit të ngjallur nga ana e
Kishës, e cila këtë ditë kremton edhe festën e Zojës Ndihmëtare.