Papa lë mesazhin e shpresës se paqja në Tokën Shenjte nuk është utopi. Me ne, Patriku
Fuad Tual dhe atë Pierbatista Picabala.
(17.05.2009 RV)Por cili është mesazhi
që Papa la në Tokën Shenjte e si e përjetuan njerëzit e saj, ata që jetojnë gjithnjë,
me vetëdijen se nuk mund të qëndrohet në këto troje pa peshën e kryqit. Të dëgjojmë
Patrikun latin të Jeruzalemit, Fuad Tual: Lë një mesazh shprese. Nuk
duhet të presim mrekulli, pas nisjes së tij, por ai ka mbjellë shumë, e na takon ne
t’i japim Zotit kohën dhe momentin për të korrur atë që kemi mbjellë, të gjithë sëbashku.
Kontaktet e Papës me Kishën lokale e me autoritetet civile, për mua, ishin shumë pozitive.
La shpresë për të gjithë, si në Jordani, ashtu edhe në Izrael e Betlehem. Pastaj,
takimi formal me kryeministrin Netanijahu preku argumenta që kanë të bëjnë me jetën
e Kishës lokale. Për ne është e domosdoshme e jemi gjithnjë në pritje, me shpresë. Çfarë mund të ndryshojë
pas vizitës së Benediktit XVI në Tokën Shenjte? Përgjigjet Rojtari i Tokës Shenjte,
atë Pierbatista Picabala: Paqja e vërtetë këtu do të kërkojë me siguri
shumë kohë. Ajo paqe bazohet mbi integritetin, mbi dinjitetin e personave, mbi marrëdhëniet
absolutisht të lira, mbi besimin. Kjo do të kërkojë shumë kohë, por duhet ta përgatisim.
Këto shenja, këto gjeste, vizita e Papës, për shembull, janë etapa të rëndësishme
që tregojnë se ku duhet të shkojmë e sidomos, na tregojnë se paqja është e mundur:
nuk është ëndërr, as utopi, por nëse e duam mund të bëhet realitet.