Pendestaria Apostolike bën të njohur dekretin për Vitin Meshtarak kushtuar Shën Gjon
Mari Vianejt.
(13.05.2009 RV)Po afrohet dita kur do të festohet 150-vjetori i kalimit në
amshim të Shën Gjon Mari Vianejt, famullitari i Arsit, i cili në këtë botë pat qenë
një shembull i shkëlqyeshëm i Bariut të vërtetë në shërbim të grigjës së Krishtit. Duke
qenë se shembulli i tij është i përshtatshëm për të nxitur besimtarët, dhe veçanërisht
meshtarët, për të përqafuar virtytet e tija, Ati i Shenjtë Benedikti XVI vendosi që
me këtë rast, nga 19 qershori 2009 deri më 19 qershorin 2010 e gjithë Kisha të kremtojë
një vit të posaçëm meshtarak, gjatë të cilit meshtarët të përforcohen më shumë në
besnikërinë e tyre ndaj Krishtit me meditime, ushtrime shpirtërore e vepra të tjera
të pëlqyeshme. Ky Vit i Shenjtë do të nisë me solemnitetin e festës së Zemrës së
Krishtit, ditë e shenjtërimit meshtarak, kur Ati i Shenjtë do të kremtojë Mbrëmësoren
përpara relikeve të shenjta të Shën Gjon Maria Vianejt, sjellur në Romë nga Ipeshkvi
i Beli – Arsit. Po ashtu do të jetë Ati i Shenjtë ai që do ta mbyllë këtë Vit të Shenjtë
në sheshin e Shën Pjetrit në Romë, në praninë e meshtarëve ardhur nga e gjithë bota,
të cilët do të përtërijnë besnikërinë ndaj Krishtit. Meshtarët të impenjohen sa
më shumë, me uratë dhe vepra të mira për të nxjerrë nga Meshtari i Lartë dhe i Përjetshëm
Jezu Krisht, hirin e Besimit, të Shpresës e të Dashurisë si edhe virtytet e tjera,
e t’i dëshmojnë këto në jetën e tyre, por edhe në paraqitjen e jashtme, të jenë plotësisht
të përkushtuar ndaj përparimit shpirtëror të popullit, vepër kjo që Kisha ka pasur
gjithmonë për zemër më shumë se asgjë tjetër. Për ta arritur sa më mirë këtë qëllim
do të ndihmojnë shumë edhe hiret e Ndjesave të Plota, që Pendestaria Apostolike me
anë të dekretit të mëposhtëm, miratuar sipas dëshirës të Atit të Shenjtë, do të japë
pa kursim gjatë këtij Viti.
Të gjithë meshtarëve që janë
penduar me të vërtetë, të cilët në një ditë çfarëdo do të thonë me devocion Lavdet
e Mëngjesit ose të Mbrëmjes përpara të Shenjtnueshmit, qoftë Ky në elter për adhurim
të të gjithëve apo në tabernakull, dhe që simbas shembullit të Shën Gjon Maria Vianejt
do të tregohen të gatshëm me shpirt për kremtimin e Sakramenteve, veçanërisht të atij
të Rrëfimit, do të fitojnë Ndjesën e Plotë, të cilën mund ta marrin edhe për sivëllezërit
e kaluar në amshim, nëse sipas normave në fuqi, do t’i afrohen Rrëfimit dhe Eukaristisë,
dhe nëse do të luten sipas ndjeteve të Papës.
B. Gjithashtu të
gjithë besimtarëve të penduar që në Kishë apo në orator do të marrin pjesë me devocion
në Meshë, e që do t’i luten Jezu Krishtit për meshtarët, u jepet Ndjesa e Plotë, me
kusht që t’i kenë shlyer mëkatet e veta me pendesë dhe me uratë sipas ndjeteve të
Papës Shenjtë në këto ditë: në atë të 150-vjetorit të kalimit në amshim të Shën Gjon
Maria Vianejt; të enjten e parë të muajit dhe në çdo ditë tjetër që caktohet nga Ordinarët
e vendit.
Të moshuarve, të sëmurëve dhe të gjithë atyre që për arsye të
forta nuk mund të dalin nga shtëpia, e që e kanë shpirtin larg nga çdo lloj mëkati
e që në zemër të tyre dëshirojnë t’i përmbushin tri kushtet e zakonshme porsa t’u
jepet mundësia, do t’u jepet në mënyrë të barabartë Ndjesa e Plotë në ditët e përmendura
më lart. Në fund Ndjesën e Plotë mund ta fitojnë edhe të gjithë besimtarët sa herë
që do të thonë me devocion pesë “At’ ynë”, “Falemi Mri” dhe “Kjoftë lumnia” apo uratë
të tjera të miratuara posaçërisht në nder të Zemrës Tejet të Shenjtë të Jezu Krishtit
e që thuhen për meshtarët, që këta të qëndrojnë të pastër dhe të shenjtë.
Dekreti
në fjalë është i vlefshëm për të gjithë vitin pavarësisht udhëzimeve të tjera që mund
ta kundërshtojnë atë.