Papa refugjatëve të kampit “Aida”: tragjik ndërtimi i murit, por për arritjen e paqes,
izraelitët e palestinezët duhet të dalin nga spiralja e dhunës
(13.05.2009 RV)Pasditja e Papës
filloi në orët e para me vizitën në Shpellën e Lindjes së Krishtit, e cila ndodhet
në Bazilikën me të njëjtin emër. Në këmbët e Elterit të Lindjes së Krishtit, nën kujdesin
e greko-ortodoksëve, nën një pllakë mermeri ndodhet një yll i argjendtë ku shkruhet
në latinisht “Këtu, nga Virgjëra Mari, lindi Jezu Krishti”. Më pas, nga kujtimi
i Foshnjës Hyjnore në foshnjet e sotme, në Spitalin e Fëmijëve të Karitasit, gjithnjë
në Betlehem. Benedikti XVI u prit nga dy ipeshkvij përfaqësues të katolikëve të Zvicrës
e Gjermanisë, që mbështesin spitalin, pastaj vizitoi pavionin e të porsalindurve e
më tej, u ndal në kapelë për një lutje. Prekës momenti i marrjes në duar të një fëmije
lindur para kohe, me emrin Elias. I bukur edhe çasti i lutjes para shtatores së Zojës,
e cila në vitin 2002 u qëllua nga tanket izraelite, gjatë pushtimit të Betlehemit.
Benedikti XVI i dhuroi spitalit një aparat të teknologjisë së lartë për fëmijët e
lindur para kohe. Pas spitalit, një realitet i hidhur e priste Atin e Shenjtë,
Kampi i Refugjatëve “Aida”, ku ndodhen rreth 5 mijë palestinezë, të vendosur aty në
vitin 1948, pas lindjes së Shtetit të Izraelit, dhe më 1967, pas së ashtuquajturës
“luftë të gjashtë ditëve”. Aktualisht, në të gjitha kampet e Territoreve, jetojnë
1 milion e 300 mijë palestinezë. Papa u shprehu atyre solidaritetin e tij personal
dhe u bëri jehonë aspiratave të ligjshme për strehë, për t’u kthyer në vendet e lindjes
e për të pasur një atdhe. Kujtoi ngjarjet e majit 1948 dhe vitet e konfliktit akoma
të pazgjidhur, që i pasuan, e iu drejtua refugjatëve me këto fjalë: “Aspiratat
tuaja të ligjshme për një atdhe të përhershëm, për një shtet palestinez të pavarur,
mbeten të paplotësuara. E ju jeni zënë në kurthin e spirales së dhunës, të sulmeve
e kundërsulmeve, të hakmarrjeve e shkatërrimeve të vazhdueshme, si shumë në këtë zonë
e në botë… Jemi të ndërgjegjshëm për pikën e vdekur ku duket se kanë arritur kontaktet
ndërmjet izraelitëve dhe palestinezëve – muri”. Muri! Në një botë ku muret
bien e kufijtë hapen, ka një vend, që është Betlehemi, që është vendi i lindjes së
Shëlbuesit të njerëzimit, ku muret ngrihen. E mbeten! Pavarësisht nga impenjimi i
njerëzve vullnetmirë, muri, i ndërtuar nga Izraeli me qëllime mbrojtëse, sipas versionit
zyrtar, ndan familje e fqinjë, kufizon lirinë e lëvizjes e ngurtëson zemrat. Papa
përmendi të gjitha organizatat e misionet katolike, që në këtë tokë bëhen “mjete të
paqes”, siç i quajti. Falenderoi Misionin papnor për Palestinën, i cili punon që prej
60 vjetësh, motrat françeskane të Zemrës së Papërlyer të Shën Marisë e anëtarët e
tjerë të Familjes françeskane për kontributin e tyre të jashtëzakonshëm në këto troje.
Por megjithë punë e tyre, muri mbetet: “Nga të dyja anët e murit është i nevojshëm
guxim i madh për të kapërcyer frikën e mosbesimin, nëse duam të kundërshtojmë nevojën
e hakmarrjes për humbjet apo plagosjet. Duhet zemërgjerësi për të kërkuar pajtimin
pas vitesh konflikti të armatosur. E historia na mëson se paqja arrihet vetëm kur
palët në konflikt janë të gatshme të lënë mënjanë paditë e të punojnë për qëllime
të përbashkëta, duke i marrë seriozisht interesat dhe shqetësimet e tjetrit e duke
u përpjekur me vendosmëri të krijojnë një atmosferë besimi”. Ati i Shenjtë
u kërkoi të rinjve të përgatiten që të bëhen përgjegjësit e ardhshëm të punëve të
popullit palestinez e familjeve, t’i mbështesin në studime. Papa e bëri të qartë se
kërkohet edhe impenjimi i fuqishëm i bashkësisë ndërkombëtare e përsa i përket vetes
e Selisë së Shenjtë, në fjalimin e lamtumirës nga Betlehemi, pas vizitës së kortezisë
në Pallatin presidencial, ku u takua sërish me presidentin palestinez Mahmud Abaz,
theksoi: “Ju siguroj se do të shfrytëzoj çdo rast për t’i nxitur palët e përfshira
në bisedimet për paqen të punojnë për një zgjidhje të drejtë, që të respektojë aspiratat
e ligjshme si të izraelitëve, ashtu edhe të palestinezëve. Si hap të rëndësishëm në
këtë drejtim, Selia e Shenjtë dëshiron të vendosë shpejt, në marrëveshje me Autoritetin
Palestinez, Komisionin e përhershëm dypalësh të punës, që është përvijuar në Marrëveshjen
bazë, të nënshkruar në Vatikan, më 15 shkurt 2000”. Nesër, dita e shtatë e
shtegtimit apostolik të Benediktit XVI në Tokën Shenjte, Papa do të shkojë në Nazaret,
vendi ku ndodhet Bazilika e Zojës Nunciatë, që kujton momentin e ardhjes së engjëllit
për të lajmëruar Shën Marinë se ajo mbante në kraharor Shëlbuesin e botës.