Benedikti XVI në Izrael: vij të lutem për paqen në Tokën Shenjte e në mbarë botën.
Kurrë më Shoah!
(11.05.2009 RV)Pas ceremonisë së lamtumirës
në aeroportin ndërkombëtar të Amanit - ajo e mirëseardhjes në aeroportin ndërkombëtar
Ben Gurion’ të Tel-Avivit, në Izrael, ku kishin dalë për ta pritur presidenti izraelit,
Shimon Peres dhe kryeminstri Benjamin Netanyahu. Bendikti XVI e nisi sot paradite
vizitën në Izrael duke dënuar ashpër Shoah-un dhe duke lartuar një lutje të mirëfilltë
për gjetjen e rrugëzgjidhjes së drejtë të konfliktit izraelito-palestinez. Fjalët
e para të Atit të Shenjtë në këto troje, përherë të shqeta, ishin: “I come,
to pray at the holy places to pray…”. “Vij të lutem në viset
e shenjta e do të lutem sidomos për paqen: paqen këtu, në Tokën Shenjtë e paqen në
mbarë botën.” Në fjalimin e tij të parë në Izrael, Benedikti XVI ripohoi
edhe një herë qëllimin e shtegtimit të tij. Selia e Shenjtë dhe Shteti i Izraelit
– pohoi Papa – kanë të përbashkëta shumë vlera e, mbi të gjitha, impenjimin për t’i
dhënë fesë vendin e saj të ligjshëm në jetën e shoqërisë. Rendi i drejtë i marrëdhënieve
shoqërore supozon e kërkon respektimin e lirisë dhe të dinjitetit të çdo njeriu.
E kur përmasa fetare e njeriut mohohet ose lihet në harresë, vihet në rrezik vetë
themeli i të drejtave të patjetërsueshme të njeriut. Më pas Papa u ndal tek problemi
i mprehtë i paqes ndërmjet izraelitëve e palestinezëve: “In union with people
of good everywhere...” Së bashku me të gjithë njerëzit vullnetmirë,
i lus ata, të cilët janë të ngarkuar me përgjegjësi, të zbulojnë çdo rrugë të mundshme
për t’i zgjidhur drejtë vështirësitë e panumërta, që të dy popujt të jetojnë në
paqe e të kenë atdheun e tyre, brenda kufijve të sigurtë e të njohur ndërkombëtarisht”. Në këto çaste, kur procesi i paqes në zonë rrezikohet nga rivendikimet e ekstremizmat,
Benedikti XVI foli për shpresë e u lut të krijohet sa më shpejt atmosfera e besimit,
e cila i bën palët të afta për një progres të vërtetë në udhën drejt paqes e stabilitetit. Duke
iu drejtuar presidentit Perez, Papa nënvizoi: “Është e drejtë dhe e arsyeshme që
gjatë vizitës sime në Izrael, të kem mundësinë për të nderuar kujtimin e gjashtë milionë
hebrenjve, viktima të Shoah e të lutem që njerëzimi të mos jetë kurrë më dëshmitar
i një krimi kaq të përbindshëm. Për fat të keq, antisemitismi vijon ta ngrejë kokën
e tij të neveritshme në shumë vende të botës. E kjo është krejtësisht e papranueshme.
Duhet bërë gjithçka është e mundur për ta luftuar antisemitizmin, kudo që gjindet,
e për të promovuar respektin e nderimin ndaj të gjithë njerëzve, pavarësisht nga populli,
raca, gjuha e kombi, të cilit i pëkasin, në mbarë botën. E, duke kujtuar Qytetin
e Jeruzalemit, Ati i Shenjtë shprehu besimin se të gjithë shtegtarët e të tri feve
të mëdha monoteiste do të kenë mundësi të hyjnë lirisht e pa asnjë pengesë për të
marrë pjesë në kremtimet fetare, hyrje që autoritetet izraelite shpesh herë e kufizojnë
për arsye sigurie. Së fundi, një mendim për kishën e vogël vendase, e thirrur të
dëshmojë Krishtin, i cili predikoi faljen e pajtimin, të mbrojë shenjtërinë e jetës
e të kontribuojë për t’i dhënë fund armiqësive, që i trondisin prej kohe këto troje: “I
pray that your continuing presence in Israel...” Lutem që prania
juaj e vazhdueshme në Izrael e në Territoret Palestineze – përfundoi
Benedikti XVI – të sjellë shumë fryt në promovimin e paqes e të respektit
reciprok ndërmjet të gjithë njerëzve, që jetojnë në tokën e Biblës” Duke
u rikthyer në fillimin e ceremonisë së mirëseardhjes në aeroportin ndërkombëtar‘Ben
Gurion’ të Tel-Avivit, kujtojmë se për ta pritur Papën, përveç presidentit izraelit,
Shimon Perez dhe kryeministrit Benjamin Netanyahu, kishin dalë edhe të gjithë ipeshkvijtë
e Tokës Shenjte. Presidenti Peres, në fjalimin e tij, nënvizoi misionin e rëndësishëm
të Papës në mbrojtje të paqes, inkurajoi dialogun hebraiko-kristian, nënvizoi bashkëjetesën,
në Izrael, të shumë popujve, që lusin të njëjtin Hyj dhe njoftoi se, pas paqes me
Egjiptin e Jordaninë, Izraeli po impenjohet në bisedimet për paqe me Palestinezët.
Gazetat shkruajnë se Benedikti XVI vjen në Izrael për një vizitë historike, si njeri
i paqes. ‘Jerusalem Post’ flet për vizitë ‘epokale’ e shumë mjete të tjera të komunikimit
nënvizojnë se çështja ‘Uiljamson’ tashmë është kapërcyer. I veçantë një nga titujt
e së përditshmes ‘Haaretz’, që flet për një mision të mundshëm, për misionin e paqes,
që përbën sfondin e këtij shtegtimi papnor.