Atë Lombardi nga Toka e Shenjtë flet për “Shpresë e paqe”.
(10.05.2009 RV)“Shpresë e paqe” titullohet editoriali i sotëm i Atë Federiko
Lombardit për të përjavshmen e Qendrës Televizive të Vatikanit:
“Të gjithë
të jemi njerëz të shpresës. Të gjithë, të vendosur në dëshirën e në përpjekjet tona
për paqen!”. Me këto fjalë Benedikti XVI mbyllte mesazhin e tij të shkurtër duke
përfunduar audiencën e përgjithshme, në prag të nisjes për udhëtimin drejt Tokës Shenjte.
Shpresë e paqe: nuk mund të përmblidhej më mirë shpirti që e frymëzon këtë shtegtim.
Shtegtim, që nis me shikimin mbi Tokën Shenjte nga maja e Malit Nebo e
nga vendi i Pagëzimit të Jezusit, për të përshkuar, më pas, nga Betlehemi në Nazaret,
etapat e jetës së Zotit, deri në Golgotë, në Varr e në Ringjallje, në Çenakullin e
Rrëshajëve. Feja shoqëron ngjarjet e jetës e të historisë; e di se duhet
t’i bëjë llogaritë me Mundimet e me Kryqin, për të fituar jetën. Papa kalon përmes
kujtimeve e aktualitetit të tensioneve e të vuajtjeve më dramatike, duke u lutur që
Shpirti Shenjt të shërojë, të ndriçojë, të gjallërojë impenjimin e të gjithë njerëzve
që punojnë për paqen. Jemi me të në udhën e shpresës e të paqes!”.