Sekretari i Përgjithshëm i NATO-s, Scheffer në Shqipëri
(08.5.2009 RV)Sekretari i Përgjithshëm i NATO-s, Jap de Hop Skefer ndodhej
sot për një vizitë në Tiranë, ku mori pjesë në mbledhjen e Ministrave të jashtëm të
Kartës së Adriatikut, presidente e radhës e së cilës është aktualisht Shqipëria. Në
mbledhje ishin të pranishme përveç Shqipërisë, edhe Bosnjë-Hercegovina, Maqedonia,
Mali i Zi, Kroacia, përfaqësues amerikanë dhe evropianë. Gjatë qëndrimit, Skefer u
nderua nga presidenti Bamir Topi me urdhërin “Gjergj Kastrioti Skënderbeu” dhe nga
Universiteti i Tiranës me titullin doktor “Honoris Causa”, për “kontributin e veçantë
në realizimin e aspiratës së popullit shqiptar për të qenë pjesë e strukturave euro-atlantike,
që mbrojnë vlerat e demokracisë, sigurisë dhe paqen në botë”. Shqipëria dhe Kroacia
janë anëtare të NATO-s prej pak kohësh.