Papa takohet me Mbretin dhe Mbretëreshën e Jordanisë.
(08.05.2009 RV)Pasdite, në orën
17.40 me orën vendase, 16.40 me atë evropiane, Benedikti XVI i bëri një vizitë mirësjelljeje
Lartmadhërive të tyre, Mbretit e Mbretëreshës së Jordanisë. Papa u prit te porta
e pallatit nga vetë Mbreti Abdallah, i cili e shoqëroi në studion, ku u mbajt takimi
privat. Ndërkaq, në një nga sallonet aty pranë, grupi që shoqëron Atin e Shenjtë
u takua me dinjitarët më të lartë të Shtëpisë Mbretërore e me përfaqësues të qeverisë.
Në përfundim të takimit privat - fotografitë zyrtare dhe shkëmbimi i dhuratave. Dhurata
e Papës ishte ‘Stampa Civitas’ – Harta e re e Qytetit të Vatikanit, gravurë origjinale
e gdhendur me daltë sipas idesë e vizatimit të Pierluigji Izola-s, skalitur nga Patricio
di Shulo e Gjuzepe Greko, stampuar me dorë nga Antonio Sanino. Mbreti i Jordanisë,
Lartmadhëria e Tij, Abdallah II Bin Al-Hussein, djali i parë i Mbretit Hussein dhe
i gruas së tij të dytë, Princeshës Muna (Antoinette Gardner), lindi në Aman më 30
janar 1962. Studioi në Akademinë Ushtarake Britanike të Sandhurst, në Oksford dhe
në Georgetown në SHBA. Gjeneral divizioni në Ushtri, Komandat i Njësive speciale kundër
terrorizmit, zuri në fron vendin e të jatit, pak ditë para vdekjes së tij. Sovran
që nga 7 shkurti 1999, është pritur në audiencë nga Gjon Pali II më 18 shtator 1999
në Kastel Gandolfo. Është i martuar me mbretëreshën Rania (Al-Yassin) me të cilën
ka katër fëmijë. Mbreti Abdallah është pasardhësi i 43-të i drejtpërdrejtë i Profetit
Muhamed, në vijë mashkullore, që nis me nipin e Profetit Al-Hasan, sepse vetë Profeti
nuk pati djalë. Dinastia hashemite ka qeverisur në Mekë që nga viti 1201, deri në
vitin 1925. I nderuari Hussein Bin Ali (stërgjysh i Mbretit Abdallah), Emir i Mekës
e mbret i Hegjiazit, udhëhoqi revoltën e madhe arabe të vitit 1916 kundër pushtimit
otoman, që përfundoi me çlirimin dhe me krijimin e shteteve të Hegjiazit, Sirisë,
Irakut e Transjordanisë. Djali i dytë i mbretit Hussein, Abdallah, themeloi emiratin
e Transjordanisë më 11 prill të vitit 1921. Emirati, pasi fitoi pavarësinë nga Britania
e Madhe më 22 mars 1946, që nga kjo datë quhet Mbretëria hashemite e Jordanisë. Mbreti
Hussein (që mbretëroi nga 1952 deri më 1999), priti Palin VI gjatë shtegtimit të tij
në Tokën Shenjte në vitin 1964 dhe e shoqëroi deri tek portat e Jeruzalemit. U prit
disa herë nga Gjon Pali II. Përfundon kështu dita e parë e shtegtimit të Papës
në Jordani. Nesër ju ftojmë ta ndjekim së bashku Atin e Shenjtë në Malin Nebo, në
bazilikën e Memorialit të Moisiut; në Madaba, pastaj, ku do të bekojë gurin e parë
të Universitetit të patriarkatit, në Muzeun hashemit e në Xhaminë Al-Husein Bin Talal
të Amanit, në takimin me krerët fetarë myslimanë, me Trupin diplomatik dhe me Rektorët
e universiteteve jordaneze , së fundi, në kremtimin e lutjeve mbrëmësore në katedralen
e Shën Gjergjit.