Gripi i derrit: Papa lutet për të sëmurët e për viktimat
(03.05.2009 RV)Vijon shqetësimi botëror
për gripin e derrit: OMS-i mendon se alarmi është serioz, por edhe se pandemia mund
të shmanget. Gripi deri tani ka tre emra: ‘i derrit’, ‘gripi meksikan’ dhe ‘gripi
i ri’. E me të tre, po i kall tmerrin botës, sepse numri i të vdekurve nga kjo sëmundje
e papritur, e re, me një emër aspak tingëllues, po shtohet çdo ditë, e çdo ditë lexojmë
emrin e një vendi të ri në listën e viseve të prekura nga sëmundja. Ndërsa SHBA po
marrin të gjitha masat për ta përballuar këtë grip të ri, në Evropë deri tani numri
i të sëmurëve është rritur në 4 vetë: dje u fol për një rast të dyshimtë edhe në Serbi,
fare pranë kufijve të Shqipërisë. Gjithsesi alarmi nuk është aq shqetësues, sa i ditëve
të para, kur lajmi i nisur nga Meskika mori dhenë, i ndjekur menjëherë pas nga gripi.
Meksika vijon të jetë vendi më i prekur nga sëmundja, që nisi pikërisht atje.
Numri i të vdekurve e ka kaluar 150-tën, por vetëm 15 prej tyre duhet të kenë vdekur
për shkak të virusit "A-H1N1". Qeveria ka marrë vendim t’i mbyllë të gjitha qendrat
arkeologjike për të shmangur rrezikun e përhapjes së sëmundjes. Benedikti XVI
i ka shprehur afërsinë e tij popullit meksikan, duke u kërkuar mjeteve të komunikimit
ta përcjellin mesazhin e tij të solidaritetit. Ati i Shenjtë është shpirtërisht pranë
gjithë të sëmurëve, lutet për shërimin e tyre, për familjet e tyre e për pushimin
e pasosur të të vdekurve nga kjo sëmundje e papritur, e panjohur, por jo e papërballueshme!