Takim i Komisonit dypalësh Seli e Shenjtë-Izrael: përparime të dukshme në prag të
vizitës së Papës në Jeruzalem.
(01.05.2009 RV)Në një atmosferë
të ngrohtë e miqësore, me frymën e bashkëpunimit e të vullnetit të mirë, u zhvillua
në Jeruzalem një takim i Komisionit të përhershëm dypalësh të punës Seli e Shenjtë
- Shtet i Izraelit. Mbledhja plenare – njofton një komunikatë e përbashkët – u mbajt
pranë Ministrisë izraelite të Punëve të Jashtme e pati si qëllim vijimin e bisedimeve
lidhur me nenin 10, paragrafi 2, të Marrëveshjes Themelore të vitit 1993 për çështjet
e taksave e të pronave. Në notë nënvizohet se u bënë përparime të dukshme, me rëndësi
edhe pse të arritura në prag të vizitës së Papës në Jeruzalem. Delegacionet, të kryesuara,
për palën vatikanase nga imzot Pietro Parolin, zevendës – sekretar i Vatikanit për
marrëdhëniet me shtetet, e për palën izraelite, nga zëvendës-ministri i jashtëm, Daniel
Aialon – vendosën të organizojnë një takim të ri të organizmit dypalësh më 10 dhjetorin
e ardhshëm, në Vatikan. Ndërkaq do të vijojnë takimet e Komisionit të punës, për të
shpejtuar bisedimet e për ta përfunduar marrëveshjen sa më shpejt që të jetë e mundur.