Kardinali Bertone kryeson në Poloni shugurimin ipeshkvnor të imzot Jan Romeo Pavlovski,
nunc i ri apostolik në Kongo e Gabon.
(01.05.2009 RV)Pasi mori titullin
‘Doktor honoris causa” nga Universiteti katolik i Dublinit, dje pasdite kardinali
Tarçizio Bertone jetoi një çast prekës e të rëndësishëm, në sa vijon udhëtimin në
Poloni. Në qytetin Bedgoshq, sekretari i Shtetit të Vatikanit shuguroi ipeshkëv imzot
Jan Romeo Pavlovskin, emëruar nga Benedikti XVI, nunc apostolik në Kongo e në Gabon.
Në homelinë e rastit, Hirësia e tij, kardinali Bertone, kujtoi se Ungjilli arriti
në Poloni njëmijë vjet më parë. E që atëhere i shtriu rrënjët në trojet polake aq
thellë, sa as pushtimet, as persekutimet e as dhuna totalitariste nuk munden t’i
shkulin. E, njëmijë vjet më pas, një bir i Polonisë, imzot Pavlovski, pasi ka shkelur
në vise të ndryshme të botës, në shërbim diplomatik të Selisë së Shenjtë, përgatitet
të niset për në Afrikë, për të çuar, si pëfaqësues i Papës në Kongo e në Gabon, tharmin
e bashkimit e të pajtimit, siç uroi Benedikti XVI gjatë shtegtimit të tij të kohëve
të fundit në Kamerun e Angolë. Nunci i ri shkon pranë dy kishave të reja, por
plot zell e entuziazëm, në një Kontinent si Afrika, të ri, por plot shpresa.