Universiteti Katolik i Lublinit i jep Kardinalit Bertone titullin doktor “honoris
causa”: “Kumtoni vlerat e humanizmit të krishterë në këtë epokë pesimizmi”.
(30.4.2009 RV)Sot paradite Sekretari i Shtetit të Vatikanit Kardinali Tarçizio
Bertoni inauguroi qëndrimin e tij në Poloni me një takim shumë prestigjoz. Kardinalit
Bertone, i cili do të qëndrojë në Poloni deri të dielën, Universiteti Katolik i Lublinit
i dha titullin doktor “honoris causa” në të drejtë civile, kanonike dhe administrative.
Përpara kësaj ceremonie Kard. Bertone kremtoi edhe Meshën Shenjtë gjatë së cilës theksoi
rolin e universiteteve katolike në formimin e njeriut të krishterë në një epokë si
kjo, e mbytur nga pesimizmi i atyre që i kanë humbur marrëdhëniet me Zotin. Në një
situatë si kjo, tha Sekretari i Shtetit kard. Bertone, merr rëndësi të madhe meditimi
i Fjalës së Hyjit dhe reflektimi, të cilat pastaj na çojnë tek zbulimi i së vërtetës.
Janë këto aspekte të cilat gjatë dymijë vjetëve jetë Kisha i ka dëshmuar vazhdimisht,
sikurse tregojnë edhe rrënjët e krishtera të Evropës. Më tej ai vazhdoi duke thënë:
“Kisha
nuk mbyllet në vetvete, nuk e mban për vete gëzimin e Ungjillit, por merr pjesë aktivisht
në dramën njerëzore, për ta shndërruar vuajtjen me anë të forcës së Krishtit, në një
ngjarje plot kuptim dhe për t’i dhënë shpresë njerëzimit.”
Sot – vazhdoi
Kardinali Bertone – në një epokë ku ka shndërrime të thella kulturore, dhe në të cilën
duhet zbuluar vazhdimisht solidariteti i Zotit me njeriun për të kapërcyer pesimizmin
e kësaj kohe, përgjegjësia për t’i ripohuar shtyllat e besimit të krishterë, bie mbi
ju mbi brezin tuaj.” tha ai duke iu drejtuar të pranishëmve.