Papa Benedikti XVI përqafon Abrucon: nuk jeni vetëm.
(28.04.2009 RV)Një përqafim i ngrohtë
për popullsinë e dëmtuar nga tërmeti i 6 prillit, impenjimi i Kishës për të mos lënë
askënd vetëm gjatë rindërtimit të shtëpive e institucioneve, kërkesa për të bërë “shtëpi
të qëndrueshme”, edhe në respekt të viktimave. Filloi nën një shi të vazhdueshëm vizita
e Papës Benedikti XVI në Abruco, kohë e keqe që e detyroi Atin e Shenjtë të heqë dorë
nga helikopteri e të shkojë në zonat e tërmetit me makinë, duke e shtyrë krejt programin
për rreth një orë. Etapa e parë në Ona, fshat me 300 banorë, që ka pasur 40 viktima
nga tërmeti. Papa përshëndeti njerëzit nëpër tenda e pastaj bëri një xhiro të vogël
me fuoristradën, së cilës i jepte kreu i Mbrojtjes Civile Italiane, Guido Bertolazo.
Me Benediktin XVI, një përfaqësues i qeverisë së Romës dhe kryeipeshkvi i Akuilës,
Xhuzepe Molinari: “Do të doja t’ju përqafoj me dashuri një e nga një… Kam admiruar
guximin, dinjitetin dhe fenë me të cilat keni përballuar këtë sprovë të rëndë, duke
shfaqur vullnetin e madh për të mos iu nënshtruar vështirësive” – tha Papa në fushën
me tenda të Onës, ku inkurajoi institucionet dhe ndërmarrjet të punojnë me mençuri
për rindërtimin. Pas Onës, Papa shkoi në bazilikën e Kolemaxhos për t’u lutur
para relikeve të Çelestinit V, në një skenar surreal: një pjesë e kupolës së kishës
ka rënë dhe shtyllat e mbetura në këmbë ishin përforcuar e lidhur me shiritat e Mbrojtjes
Civile. Benedikti XVI, gjithnjë i kontrolluar nga zjarrfikësit, vendosi palion papnore
mbi arkivolin e xhamtë, ku ruhen reliket e Çelestinit V. Çast prekës i vizitës
ishte takimi me të rinjtë e mbijetuar nga rënia e shkatërrimi i Shtëpisë së Studentit,
ku humbën jetën 8 vetë. Papa, veçanërisht i mallëngjyer, u ndal të fliste me disa
prej tyre e më pas vështroi gjatë ç’ka mbetet nga ndërtesa, duke u lutur sëbashku
me të rinjtë. “Bëhuni inxhinjerë të zot”, u tha Ati i Shenjtë studentëve, duke iu
referuar përgjegjësisë së inxhinjerëve dhe arkitektëve, që kanë ndërtuar pa kritere
antisizmike, banesa e institucione në Akuila. Vlejnë edhe për studentët, fjalët ngushëlluese
që Papa u tha banorëve të Onës: “Papa është këtu, sot, mes jush për t’ju thënë
edhe një fjalë ngushëllimi për të vdekurit: ata janë gjallë në Hyjin e presin prej
jush dëshminë e guximit e të shpresës. Presin ta shohin të rilindë këtë tokën e tyre,
që duhet të zbukurohet sërish me shtëpi e kisha, të bukura e të qëndrueshme. Është
pikërisht në emër të këtyre vëllezërve e motrave, që duhet të impenjohemi sërish për
të jetuar, me atë që nuk vdes e që as tërmeti nuk e shkatërroi dot: dashurinë. Dashuria
mbetet përtej kufirit të kësaj ekzistencës sonë të brishtë tokësore, sepse Dashuria
e vërtetë është Zoti. Kush do fiton, në Zotin, mbi vdekjen dhe e di se nuk i humb
ata që ka dashur”. Etapa e fundit e vizitës së Benediktit XVI në Abruco ishte
takimi me autoritetet civile e fetare, me qindra persona, banorë të vendit e vullnetarë,
në kazermën e Rojes së Financës, në Kopito. Kisha, theksoi Papa, është këtu me mua,
pranë vuajtjes suaj, merr pjesë në dhimbjen për humbjen e familjarëve dhe të miqve,
me dëshirën për t’ju ndihmuar të ndërtoni shtëpitë, kishat, ndërmarrjet e shkatërruara
ose të dëmtuara rëndë nga tërmeti: “Por – shtoi Ati i Shenjtë – edhe Bashkësia
civile duhet ta shqyrtojë seriozisht ndërgjegjen, në mënyrë që të mos mungojë niveli
i lartë i përgjegjësisë, në çdo çast. Me këtë kusht, Akuila (Shqiponja), megjithëse
e plagosur, do të fluturojë sërish”. Para se të nisej për në Vatikan, në përfundim
të ceremonisë në Sheshin e Armëve të kazermës së Rojes së Financës, Benedikti XVI
mbajti për disa çaste në kokë kaskën e një oficeri të zjarrfikësave. Para shtatores
së Zojës së Roios, Papa vendosi një trëndafil të artë, dhuratë tradicionale e papëve
për Shën Marinë, dhe u lut që Nëna e Shpresës t’i ndihmojë abrucezët të shohin përtej
vdekjes e vështirësive të momentit, dritën e ringjalljes. U mbetet abrucezëve, bekimi
dhe premtimi i Atit të Shenjtë në Ona: “Lutja ime është me ju; jemi bashkë e
Zoti do të na ndihmojë. Faleminderit për guximin, për fenë e shpresën tuaj”.