Міністр замежных спраў Італіі заклікаў Лукашэнку паважаць правы грамадзянаў
Урад Італіі заклікае прэзыдэнта Лукашэнку, які ўчора прыбыў
зь візытам у гэтую краіну, “паважаць правы і асноўныя свабоды беларускіх грамадзянаў”.
У сваім адкрытым лісьце італьянскі міністар замежных спраў Франка Фратыні
рэагуе на крытычны артыкул газэты "Corriere della Sera" у сувязі з візытам беларускага
кіраўніка Лукашэнкі ў Рым і падтрымкай італьянскага кіраўніцтва беларускага рэжыму.
Пасланьне надрукаванае ў сёньняшнім нумары Corriere della Sera.
Паводле
кіраўніка замежнапалітычнага ведамства Італіі, “Эўразьвяз прыняў рашэньне прыпыніць
некаторыя санкцыі супраць Менску і ў сувязі з пачаткам праграмы “Ўсходняе партнэрства”
запрасіць Лукашэнку ўзяць удзел у саміце 7—8 траўня ў Празе”. Мэта гэтага кроку, паводле
Фратыні, — дапамагчы Беларусі стаць на шлях паступовага дэмакратычнага разьвіцьця.
У
Рыме спадзяюцца, што візыт беларускага кіраўніка ў Італію будзе садзейнічаць сумесным
намаганьням у справе набліжэньня Беларусі да дэмакратычных стандартаў і эўрапейскіх
каштоўнасьцяў.