Benedikti XVI gjatë kremtimit për shenjtërimin e 5 të lumëve: “Shenjtorët e rinj na
tregojnë se zemra e njeriut përtërihet thellësisht nga misteri i ngjalljes së Krishtit.
(27.04.2009 RV)Drita e fytyrës
së Krishtit të ngjallur shkëlqen sot përmes tipareve ungjillore të pesë Shenjtorëve
të rinj: Arkanxhelo Tadini, Bernardo Tolomei, Nuno
de Santa Maria Alvares Pereira, Gjertrude Komensoli e Katerina
Volpiçeli. Në kremtimin për shenjtërimin e tyre, kryesuar nga Benedikti XVI
në Sheshin e Shën Pjetrit, morën pjesë shtegtarë e besimtarë të ardhur nga të katër
anët e botës. Në përfundim të Meshës, gjatë lutjes së Mbretëreshës Qiellore, Ati i
Shenjtë theksoi se shenjtorët e rinj na ndihmojnë të meditojmë për veprën shëlbuese
të Krishtit.
Duke u ndaluar tek fragmenti ungjillor i djeshëm, në të cilin
Krishti i ngjallur duket në Çenakull, Papa kujtoi se Jezusi u shfaqet nxënësve të
tij, për t’i ndihmuar t’i kuptojnë Shkrimet Shenjte e t’i rilexojnë ngjarjet e mëdha
të shëlbimit në dritën e Pashkëve. Po këtë përvojë – shpjegoi Ati i Shenjtë - e jeton
çdo bashkësi e krishterë në kremtimin eukaristik. Eukaristia është vendi i privilegjuar,
në të cilin Kisha njeh e pranon Autorin e jetës: “Duke kremtuar Eukaristinë,
komunikojmë me Krishtin, që u flijua për shlyerjen mëkateve të botës, e Ai na dhuron
faljen e jetën. Ç’do të ishte jeta jonë e krishterë pa Eukaristinë? Eukaristia është
trashëgimia e përhershme dhe e gjallë që na la Zoti në Sakramentin e Korpit e të Gjakut
të vet, për të cilën duhet të mendojmë e të thellohemi vazhdimisht me qëllim që, siç
pohon i nderuari Papa Pali VI, ta ndikojë forcën e vet të pashterrshme në të gjitha
ditët e jetës sonë të vdekshme”. Të ushqyer me bukën eukaristike, Shenjtorët
e rinj që po i nderojmë sot – shtoi Papa – e çuan deri në fund misionin e tyre të
dashurisë ungjillore në fushat e ndryshme të veprimtarisë, në përkim me karizmat
e tyre të posaçme. Prandaj drita e fytyrës së Krishtit të ngjallur shkëlqen sot përmes
tipareve të tyre ungjillore: “Ngjarjet e ndryshme njerëzore e shpirtërore të
Shenjtorëve të rinj na tregojnë se zemra e njeriut përtërihet thellësisht nga misteri
i ngjalljes së Krishtit; mister themelor, që drejton e udhëheq gjithë historinë e
shëlbimit. Me të drejtë, prandaj, Kisha, gjithnjë e aq më shumë në këtë kohë Pashkësh,
na fton ta drejtojmë vështrimin nga Krishti i ngjallur, vërtetë i pranishëm në Sakramentin
e Eukaristisë”. Më pas Papa skicoi biografitë e Shenjtorëve të rinj, duke vënë
theksin mbi tiparet themelore të secilit prej tyre. Për Arkanxhelo Tadinin,
meshtar italian nga Bresha, që jetoi ndërmjet viteve 1844-1912, theksoi se ishte ‘njeri
që ia kushtoi plotësisht vetveten Zotit’. Kujtoi edhe Kongregatën e Motrave Punëtore
të Shtëpisë Shenjte të Nazaretit, gra e vajza të shuguruara, por punëtore ndërmjet
punëtoreve, themeluar prej tij, me vlerë të madhe aktuale: “Sa profetike qe
kjo intuitë karizmatike e Don Tadinit e sa aktual mbetet shembulli i tij sot, në një
epokë të pushtuar nga kriza e rëndë ekonomike. Ai na kujton se vetëm duke mbajtur
lidhje të vazhdueshme e të thellë me Zotin, posaçërisht në Sakramentin e Eukaristisë,
mund ta çojmë tharmin e Ungjillit atje ku punohet e në çdo mjedis tjetër të shoqërisë
sonë”. Duke folur për Bernardo Tolomein, lindur në Sienë të Italisë
më 1272, Papa vuri theksin mbi jetën e tij vetmitare, të ushqyer me dashuri e lutje,
mbi rolin që luajti në themelimin e kuvendit të Shën Marisë së Malit Oliveto, sipas
rregullës së Shën Benediktit e mbi ndihmën që u dha, më 1348, sivëllezërve e qytetarëve
gjatë epidemisë së tmerrshme të murtajës, e cila i shkaktoi edhe vdekjen. Kujtimin
e njeriut të lutjes, të pendesës e të besimit të plotë në ndihmën e Zotit la pas
edhe Nunjo Alvares Pereira. Gjeneral në moshën 23 vjeçare, hero kombëtar i
Portugalisë në moshë të pjekur, ndërroi shpatën me zhgunin e karmelitanit, duke u
treguar të gjithëve – theksoi Papa - se vlerat dhe parimet e jetës së krishterë mund
të vihen në jetë edhe në një kontekst krejt të pafavorshëm, siç është ai i betejave,
ku të duket se di të flasë vetëm arma. Duke kujtuar Katerinën Komensoli,
lindur në afërsitë e Breshës, në vitin 1847, themeluese e Institutit të Adhurueseve
të Eukaristisë, Benedikti XVI theksoi se adhurimi i të Shenjtnueshmit Sakrament duhet
t’u paraprijë të gjitha veprave të dashurisë së krishterë, sepse nga dashuria për
Krishtin e vdekur e të ngjallur, vërtetë të pranishëm në Sakramentin eukaristik, buron
ajo ndjenjë ungjillore, që na bën vëllezër e motra me të gjithë njerëzit. Dëshmitare
e dashurisë hyjnore ishte edhe Katerina Volpiçeli, themeluese e Institutit
të Shërbëtoreve të Zemrës së Krishtit. Bëri çmos t’i përkiste e tëra Zotit, për t’ia
çuar gjithë atyre që takoi në Napolin e tetëqindës. Edhe e fshehta e shenjtërisë së
saj ishte lidhja e ngushtë me Eukaristinë – theksoi Ati i Shenjtë - e shtoi: “Për
të qenë edukatore të vërteta të fesë, plot dëshirë për t’ua transmetuar breznive
të reja vlerat e kulturës së krishterë, është e domosdoshme të lirohet Zoti nga burgjet
ku duan ta mbyllin njerëzit”. I përmblodhëm shkurtimisht biografitë e Shenjtorëve
të rinj, duke u bazuar kryesisht tek fjalët që tha për ta Papa, sepse pesë figurat
e ndritura i pasqyruam më gjërësisht në programin e djeshëm. Në fund të kremtimit
Benedikti XVI i ftoi të gjithë të krishterët të ecin në gjurmët e shenjtorëve të rinj.
Ndërsa
në lutjen e Mbretëreshës Qiellore Papa kujtoi se dje kremtohej Dita e Universitetit
Katolik të Zemrës së Krishtit. 50 vjet pas vdekjes së themeluesit të këtij Institucioni
të rëndësishëm, atë Agostino Gjemelit, Benedikti XVI uroi që Universiteti Katolik
t’i qëndrojë besnik parimeve, nga të cilat u frymëzua, për t’u ofruar përherë një
formim me vlerë breznive të reja. Në përfundim Papa falënderoi përzemërsisht shtegtarët
e shumtë, ardhur nga të katër anët e botës për të nderuar Shenjtorët e rinj: “Uroj
që ky shtegtim, i jetuar nën shenjën e shenjtërisë e i përforcuar nga hiri i Vitit
kushtuar Shën Palit, ta ndihmojë secilin nga ju për të vrapuar me hov të ri drejt
cakut të fundit, drejt çmimit që Zoti na thërret ta marrim atje lart, në Krishtin
Jezus”.