Katër vjet më parë Benedikti XVI niste Shërbimin Papnor.
(24.04.2009 RV)Katër vjet
më parë, më 24 prill 2005, Benedikti XVI kryesonte, në Sheshin e Shën Pjetrit, Meshën
Shenjte për fillimin e papnisë. T’i kujtojmë disa nga fragmentet më të rëndësishme
të homelisë, mbajtur me këtë rast, që tingëllojnë gjithnjë aktuale:
Fjalët
e para të Papës na kujtojnë se feja e mund vetminë. “Kush beson, nuk është kurrë i
vetëm – nuk është i vetëm as në jetë e as në vdekje”. Me këtë bindje e niste Benedikti
XVI Papninë e tij: “Unë, shërbëtor i ligshtë i Hyjit, duhet ta marr mbi vete
këtë detyrë të pashembullt, që e kapërcen çdo aftësi njerëzore. E si mund ta bëj
këtë? Si do të jem në gjendje ta bëj? Ju të gjithë, miq të dashur, sapo u jeni lutur
aradheve të shenjtorëve, të përfaqësuar prej disa emrave të mëdhenj të historisë
së Hyjit me njerëzit. Në këtë mënyrë, edhe në shpirtin tim ngjallet kjo vetëdije:
nuk jam i vetëm! Nuk do ta mbart i vetëm këtë barrë, të cilën në të vërtetë nuk do
të mund ta mbartja kurrë i vetëm. Aradhet e shenjtorëve të Hyjit më mbrojnë, më ndihmojnë
e më mbajnë në krahë. E lutja juaj, miq të dashur, ndjesa juaj, dashuria juaj, feja
juaj e shpresa juaj më shoqërojnë”. Feja nuk është ideologji: prandaj ‘Kisha
është e gjallë’ edhe tani, pas dymijë vjetësh. Është e gjallë – pohon Papa - sepse
Krishti është i gjallë, sepse Jezusi u ngjall me të vërtetë. Vërtetësi e përvujtëri
janë dy përmasat kyçe të gjithë papnisë së Benediktit XVI. Feja e vërtetë është e
tillë vetëm në se jetohet përvujtërisht. Benedikti XVI, ashtu si shumë të tjerë, mund
të ketë ide nga më të ndryshmet mbi programin e tij. Por ajo që ka rëndësi të dorës
së parë, është tjetër: “Programi im i vërtetë i qeverisjes është që
të mos bëj vullnetin tim, të mos ndjek idetë e mia, por t’ia vë veshin, së bashku
me gjithë Kishën, fjalës e vullnetit të Hyjit e ta lë Atë të më prijë, të jetë ai
vetë që e udhëheq Kishën në këtë orë të historisë sonë”. Një fjalë tjetër
kyçe e Papnisë, është afërsia me njeriun. Vikari i Krishtit duhet ta ndjekë Mësuesin
në kërkim të deles së humbur: “Shqetësimi i shenjtë i Krishtit duhet të jetë
shqetësimi i bariut: ai nuk i shikon me indiferencë njerëzit e shumtë, që vijojnë
të jetojnë në shkretëtirë. E shkretëtira ka një mori formash. Ka formën e varfërisë,
të urisë, e të etjes, të braktisjes, të vetmisë, të dashurisë së shkatërruar”. Afërsia
me njeriun – na kujton Papa - kërcënohet nga lakmia e nga hipokrizia e pushtetit,
që premton çlirim. Por, “Nuk është pushteti ai që të shpëton. Njeriun mund ta shpëtojë
vetëm dashuria, mund ta shpëtojë “Zoti që u bë qengj e që na thotë se botën e shpëton
i Kryqëzuari e jo kryqëzuesit”: “Prandaj thesaret e tokës nuk janë më në
shërbim të ndërtimit të kopshtit të Hyjit, në të cilin të gjithë mund të jetojnë,
por u shërbejnë forcave shfrytëzuese e shkatrrimtare. Kisha në tërësi, e barinjtë
në gjirin e saj, ashtu si Krishti, duhet të vihen për udhë, për t’u prirë njerëzve
jashtë shkretëtirës, drejt vendeve ku ka jetë, drejt miqësisë me birin e Hyjit, drejt
Atij që dhuron jetë, e jetë me begati”. Benedikti XVI kujton fjalët që
Jezusi ia tha Pjetrit: “Kulloti delet e mia!”: “Të kullotësh do të thotë
të duash, e të duash do të thotë edhe të jesh gati të vuash. Të duash do të thotë:
t’u japësh deleve atë që është vërtetë e mirë, t’i ushqesh me të vërtetën e Hyjit,
me fjalën e Hyjit, me praninë e tij, me shujtën që na dhuron në të Shenjtnueshmin
Sakrament. Të dashur miq! … lutuni për mua, që unë të mos ik, nga frika, përballë
ujqërve”. Njeriu shpesh beson se është i lirë. Ndërsa Papa na kujton
se jetojmë si të sëmurë, në errësirë, në vuajtje e në vdekje. Ja, atëherë, detyra
e të krishterëve: “Ne ekzitojmë për t’u treguar Hyjin njerëzve. E
vetëm atje ku shihet Zoti, fillon vërtetë jeta. Vetëm kur në Krishtin takojmë Hyjin
e gjallë, kuptojmë ç’do të thotë jetë. Nuk jemi prodhim rastësor e pa kuptim i evolucionit.
Secili nga ne është fryt i një mendimi të Hyjit. Secili nga ne është i dëshiruar,
secili është i dashur, secili, i nevojshëm. S’ka gjë më të bukur se të prekesh nga
hiri i Ungjillit, i vetë Krishtit. Gjë më të bukur s’ka, sesa ta njohësh Krishtin
e t’ua komunikosh edhe të tjerëve dashurinë e tij”. “Vetëm përmes kësaj
miqësie” – pohon Papa – ne provojmë gjithçka është e bukur, gjithçka të çliron. Fjalët
e fundit të homelisë janë thirrje drejtuar të rinjve: “Kështu, sot,
dëshiroj, me forcë të madhe e bindje të madhe, të nisem nga pervoja e jetës sime të
gjatë, për t’ju thënë juve, të rinj të dashur: mos kini frikë nga Krishti! Ai nuk
ju merr asgjë e ju dhuron gjithçka. Kush ia dhuron atij vetveten, merr njëqindfishin.
Po, hapjani, në dy kanatat, portat Krishtit – e do të gjeni jetën e vërtetë. Amen!".