(22.04.2009 RV)Para se të flasim për Kryqin e DBR-së(Ditës Botërore të Rinisë),
po kujtojmë ç’kuptim ka Kryqi. Kur bëjmë shenjën e Kryqit, me fjalë shprehim
Njëninë dhe Trininë e Zotit (në emër të Atit e të Birit e të Shpirtit Shenjt), ndërsa
simboli i Kryqit na kujton Mundimet, Vdekjen e Ringjalljen e Shëlbuesit tonë, Jezu
Krishtit.
Të njihemi, pra, me këtë simbol, që tashmë ka përshkuar rrugët e
mbarë botës, deri në skajet më të humbura të saj, duke çuar kudo dritën shpërblyese
të Krishtit të Ngjallur. Kryqi është i lartë 3 metra e 80 centimetra. Krahët
e tij janë 1 metër e 75 centimetra. Peshon 31 kilogram. Vendoset në një piedestal
51 centimetra të lartë, 45 centimetra të gjërë.
Si lindi Kryqi i DBR. Gjatë
Jubileut të shpërblimit të 1984-tës, Papa Gjon Pali II ua besoi të rinjve të mbarë
botës një kryq të thjeshtë, bërë me dy copa të zakonshme druri të kryqëzuara, që ta
mbartnin si simbol i fesë së tyre. Ky Kryq sot është simbol i DBR-së. Ashtu si të
rinjtë që marrin pjesë në DBR, edhe kryqi shtegton nëpër botë dhe i inkurajon ta thellojnë
fenë e tyre e ta jetojnë në mënyrën më të sinqertë. Hiret që kanë shoqëruar kryqin
e DBR-së janë të panumërta. Ai tashmë është pranuar si dhuratë e Zotit për të rinjtë
e për Kishën. Duke pranuar Kryqin edhe për ngjarje të tjera të mëdha, të rinjtë
dëshmojnë fenë e tyre. Nga ana e jashtme, ata e nderojnë dhe e mbartin në publik.
Nga ana e brëndshme, hiret që fitojnë janë domethënëse, ndonëse shumë prej tyre nuk
njihen publikisht. Të gjithë ata që e kanë mbartur, e kanë kundruar e e kanë adhuruar
Kryqin, kanë pohuar se i ka ndihmuar ta kuptojnë më mirë Shëlbimin. Të gjithë, në
saje të Kryqit, janë bërë më të vetëdijshëm për dashurinë e Krishtit, që u ka dhënë
guxim të jetojnë si të krishterë të vërtetë.
Fjalët e Papës Gjon Pali II
për Kryqin e DBR-së "Të dashur të rinj, në përfundim të Vitit Shenjt, jua dorëzoj
simbolin e këtij viti jubilar, "Kryqin e Krishtit": çojeni nëpër botë si shenjë të
dashurisë së Krishtit për njerëzimin e kumtojini të gjithëve se vetëm në Krishtin
e vdekur e të ringjallur, gjindet shëlbimi e shpërblimi i njerëzve.
(Nga
Homelia e Vitit Shenjt , 22 prill 1984).
Fjalët e Papës Benedikti XVI
në kujtim të 25-vjetorit të Kryqit të DBR-së “Të dashur miq, jua besoj përsëri
këtë Kryq! Vijoni ta çoni në të katër anët e tokës, që edhe breznitë e ardhshme ta
zbulojnë mëshirën e Hyjit e ta mbajnë gjallë në zemra shpresën në Krishtin e kryqëzuar
e të ngjallur”.