Kardinali Bertone do të përurojë ekspozitën e Biblës karolinge të shekullit IX, në
Abacinë e Shën Palit jashtë mureve të Romës.
(17.04.2009 RV)Është hera e parë, në
historinë e saj mijëvjeçare, që Bibla me 336 faqe pergamene, e porositur nga Karli
i Shogët, dhuruar Papës Gjoni VIII, mund të admirohet në Abacinë e murgjërve benediktinë
të Shën Palit jashtë Mureve të Romës, të cilët që nga shekulli VIII kremtojnë liturgjinë
mbi Varrin e Apostullit të Popujve, në Bazilikën papnore mbi rrugën Ostiense. Nismën
për ta ekspozuar Biblën e mrekullueshme, përplot me kryevepra të miniaturës, e morën
vetë murgjërit si dhe abati i tyre, atë Edmund Pauer, për të nënvizuar kështu vlerën
e Vitit kushtuar Shën Palit, përmes një ekspozite me vlera të mëdha artistike e shpirtërore.
Ekspozitën do ta përurojë të dielën e ardhshme kardinali Tarçizio Bertone, sekretar
i Shtetit të Vatikanit. Bibla karolinge është shumë e veçantë nga pikëpamja stilistike,
ilustrative e edhe e teksteve, të cilat janë ato të Vulgatës, në qendër të vëmendjes
së opinionit të kohës. Teksti i Vulgatës, përkthyer në latinisht nga Shën Jeronimi,
u rishkrua në pergamenë e u stolis me miniatura nga amanuensët, sipas porosisë së
Karlit të Shogët. Mbreti karoling i dha një shtytje të madhe zhvillimit të kulturës
në përgjithësi e, në veçanti, asaj që kishte të bënte me Fjalën e Zotit e me liturgjinë,
me këngën liturgjike e me gjithçka lidhej me veprimtarinë e Kishës. E pyetëm abatin,
Atë Edmund Pauer, ç’i bëri më shumë përshtypje duke parë një vepër të kësaj
natyre, si Bibla karolinge?
Përgjigje: - Kur e shikoj këtë
vepër arti, mbetem i mrekulluar nga disa gjëra. Nga historia e saj, për shembull.
Ekziston që prej 1 mijë e 100 vjetësh, e megjithatë ngjyrat janë ende të ndritshme,
si të ishin përdorur sot. Ka, pastaj një faqe, që tregon ngjarjet kryesore të jetës
së Shën Palit, kur ndodhet para Sinedrit e kryepriftërinjve, e pastaj edhe kthimin
e Apostullit. Shihet qartë se çdo fjalë është shkruar me dashuri, me kujdes e me bindjen
se ajo që shkruhej e pikturohej, do të ndikonte mbi gjithë kulturën e Evropës.