Віншаванне Бэнэдыкта XVI кардыналу Казіміру Свёнтку з нагоды юбілею святарскага служэння
08.04.2009 18:02 + catholic.by +
Шаноўнаму нашаму брату Казіміру Свёнтку, кардыналу святога
Рыма-каталіцкага Касцёла, арцыбіскупу Мінска-Магілёўскаму на пенсіі,
Апостальскаму Адміністратару Ad nutum Sanctae Sedis Пінскай
дыяцэзіі лацінскага абраду Перад велікоднай урачыстасцю ў сераду Вялікага
тыдня прыпадае, шаноўны наш брат, твой асаблівы і надзвычайны юбілей, а менавіта 70-я
гадавіна святарскага пасвячэння. Мы не жадаем абмінуць маўчаннем гэтую радасную падзею,
больш за тое, кіруючыся братэрскай любоўю да цябе, спяшаемся разам з табою з глыбіні
сэрца праспяваць гімн падзякі Міласэрнаму Богу за ўсе дабрадзействы, так шчодра ўдзеленыя
табе за гэты час, а праз цябе — са скарбніцы святарскага дару — іншым вернікам. Тваё
святарства, прынятае за некалькі месяцаў да Другой сусветнай вайны, было асабліва
пазначана пераследам і турэмным зняволеннем, якія нібы каштоўнымі пярлінамі аздаблялі
яго і ядналі цябе з Хрыстом, Найвышэйшым Святаром, які так шмат выцерпеў за сваіх
авечак. Пасля атрымання свабоды ты вярнуўся ў свой родны пінскі касцёл,
дзе рупліва выконваў душпастырскае служэнне. У 1991 г., у змененай рэчаіснасці, у
новай Рэспубліцы Беларусь шаноўны Слуга Божы Ян Павел ІІ, адорваючы цябе сваім даверам,
узвысіў цябе да біскупскай годнасці і ўстанавіў арцыбіскупам Мінска-Магілёўскім лацінскага
абраду і Апостальскім Адміністратарам Ad nutum Sanctae Sedis Пінскай дыяцэзіі лацінскага
абраду. Затым у 1994 г. ты быў пакліканы ў калегію кардыналаў, атрымаўшы тытулярны
касцёл у Рыме — касцёл святога Гэрарда Маэллі. Акрамя таго ты займаў пасаду першага
старшыні Канферэнцыі Каталіцкіх Біскупаў у Беларусі. Напэўна, абедзве каталіцкія супольнасці,
гэта значыць Мінска-Магілёўская лацінскага абраду і Пінская лацінскага абраду, якім
адпаведна сваім сілам ты да канца прысвяціў сваё біскупскае служэнне, а таксама ўвесь
народ вельмі радуюцца з нагоды такога прыгожага свята, звязанага з тваім святарствам. Мы
ж, нібы прысутныя разам з біскупамі, святарамі, законнікамі, законніцамі і ўсімі вернікамі,
з радасцю скіроўваем свае пажаданні з нагоды 70-й гадавіны твайго святарскага пасвячэння
і праз заступніцтва Багародзіцы Марыі, а таксама святога Казіміра жадаем табе шчодрых
Божых ласкаў і духоўнай радасці. На заканчэнне гэтыя і іншыя дасланыя табе
пажаданні пацвярджаем нашым апостальскім благаслаўленнем, якое з любоўю ўдзяляем табе
і якім жадаем агарнуць усіх, хто прымае ўдзел у радасці твайго цудоўнага юбілею. Ватыкан 25
сакавіка 2009 г. У 4-ю гадавіну Пантыфікату Папа Бэнэдыкт XVI