Benedikti XVI të rinjve spanjollë: DBR dëfton fytyrën përjetësisht të re të Kishës.
(06.04.2009 RV)Sot paradite Benedikti
XVI priti në audiencë, në Vatikan, të rinjtë spanjollë të cilët dje, gjatë Meshës
të së Dielës së Larit, morën nga bashkëmoshatarët e tyre australianë Kryqin e Ditës
Botërore të Rinisë, që do të kremtohet në nivel ndërkombëtar më 2011 në Madrid. Duke
folur për këtë takim, Papa theksoi se periudha përgatitore e DBR-së krijon menjëherë
mundësi të jashtëzakonshme për të provuar hirin, që buron nga Kisha. Ditët Botërore
të Rinisë i dëftojnë botës rininë e përjetshme të Kishës. Një Kishe, e cila të mahnit,
sepse është shtëpi ku thithet gëzimi e perceptohet dashuria që ka Zoti për çdo njeri.
Foli me ton entuziast Benedikti XVI duke iu drejtuar rreth shtatë mijë të rinjve spanjollë
– dhe kryeipeshkvit të Madridit, kardinalit Antonio Ruoko Varela – mbledhur në Sallën
e Palit VI për këtë takim me Papën, pas Meshës solemne të djeshme. Kryqi i DBR-së,
i marrë në dorëzim nga të rinjtë e Sidneit përfaqëson, tha Papa – takimin me Krishtin,
që vdiq e u ngjall. U gëzova – vijoi Ati i Shenjtë – kur mësova se këtë Kryq që morët,
do ta lartoni të Premten e Madhe nëpër rrugët e Madridit, që të brohoritet e të nderohet.
E shtoi: “Responded vosotros al amor de Cristo... Përgjigjiuni
dashurisë së Krishtit, duke dhuruar jetën tuaj me dashuri. Kështu përgatitjet për
Ditën Botërore të Rinisë, të cilat kanë nisur me entuziazëm e impenjim të madh, do
të shpërblehen me frytin që pritet nga kjo Ditë: me risimin e fuqizimin e përvojës
së takimit me Krishtin e vdekur e të ngjallur për ne”. “Ju ftoj të edukoheni
në fe, që i jep kuptim jetës suaj e ta thelloni gjithnjë këtë fe, sepse ju ndihmon
t’i përballoni pa u lëkundur vështirësitë e përditshme” - kjo ishte ftesa që u bëri
Benedikti XVI të rinjve spanjollë. E, në rrugën që të çon tek Krishti, vijoi: “Sepais
atraer a vuestros jovenes amigos... Tërhiqini edhe miqtë tuaj të
rinj, shokët e studimit e të punës, që edhe ata ta njohin e ta pranojnë si Zot të
jetës së tyre (...). Të rinjtë e sotëm kanë nevojë ta zbulojnë jetën e re, që vjen
nga Hyji, ta shuajnë etjen për të vërtetën, të cilën Kisha e mori si thesar për të
gjithë njerëzit, në burimin e saj, në Krishtin e vdekur e të ngjallur”. Papa
e përfundoi fjalimin drejtuar të rinjve, duke uruar që një sjellje e tillë, thellësisht
e krishterë, ta bëjë Madridin vend, i cili rrezaton fe e jetë, ku të rinjtë e mbarë
botës të kremtojnë me entuziazëm Krishtin: “Orad en comun, abriendo las
puertas... Lutuni së bashku, duke hapur portat e famullive, të shoqatave,
të lëvizjeve, në mënyrë që të gjithë ta ndjejnë veten në Kishë, si të ishin në shtëpinë
e tyre, të dashur me të njëjtën dashuri, që ka për ta vetë Zoti. Kremtojeni e jetojeni
fenë tuaj me gëzimin e madh, që është dhuratë e Shpirit Shenjt. Kështu zemrat tuaja
e ato të miqve tuaj do të parapërgatiten për ta kremtuar festën e madhe, Ditën e Rinisë,
e të gjithë do të provojnë Dëftimin e ri të rinisë së Kishës”.