Benedikti XVI në famullinë e Fytyrës së Krishtit: “Pas territ të vuajtjes është dielli
i Mirësisë hyjnore”. Këshillat pastorale i japin jetë Kishës, falë bashkëpunimit ndërmjet
meshtarëve e laikëve.
(30.03.2009 RV)Papa Benedikti XVI
shkoi dje për vizitë në famullinë romake të Fytyrës së Krishtit, ku kremtoi Meshën
e u foli besimtarëve të moshuar, të rritur e fëmijë. “E dimë … se Dielli, edhe
pse shpesh i fshehur, ekziston, se Zoti është afër, na ndihmon e na shoqëron. Prandaj,
në këtë kuptim, duam të shkojmë drejt Pashkëve, duke e ditur se vuajtjet e vështirësitë
i përkasin jetës sonë, por me vetëdijen se pas tyre është dielli i Mirësisë hyjnore”. Me
këto fjalë, i përshëndeti Papa qindra personat, që po e prisnin në zonën e Maljanës
të kryeqytetit italian, pavarësisht nga shiu. Famullia e Fytyrës së Krishtit karakterizohet
nga një numër i madh familjesh, të cilat shpesh janë gjithë ditën në punë, duke ua
deleguar kështu institucioneve, edhe atyre kishtare, edukimin e fëmijëve. Sidomos
të rinjve, Benedikti XVI u kërkoi të dëgjojnë se ç’kërkon Zoti prej tyre e ta ndjekin
pa frikë planin e Hyjit për ta. Papa u bëri thirrje të gjithëve të ndihmojnë personat
në vështirësi për shkak të krizës ekonomike dhe lavdëroi Karitasin e famullisë e Bashkësinë
e Shën Egjidit për punën që bëjnë në këtë drejtim. Më pas, Ati i Shenjtë vuri në dukje
rolin e madh të Këshillit pastoral të famullisë, një organizëm që Papa e përkufizoi
si “dhuratë të Koncilit II të Vatikanit”: “Në kohën tonë, kur shekullarizmi
është i fortë… është edhe më e rëndësishme që meshtari të mos jetë “solist”, por të
rrethohet nga besimtarë që, sëbashku me të, bartin në vetvete farën e Fjalës dhe ndihmojnë
që ajo të mbetet gjallë e të rritet”. Papa kujtoi vizitën e tij në Qendrën
Kardinal Lëzhè, në Jaundé të Kamerunit. Më shumë se Sida e gërbula, theksoi Ati i
Shenjtë, spikaste forca e fesë e sa e sa njerëzve në shërbim të të sëmurëve. Falë
këtyre njerëzve dhe dashurisë së tyre, vuajtja shndërrohet në diçka tjetër: “Edhe
personat që ndihmojnë shndërrohen, bëhen më njerëzorë, më kristianë, ndihet diçka
nga dashuria e Zotit. Kështu, secili në fushën e vet, të jemi edhe ne të ndjeshëm
para vuajtjes e të vuajturve, të varfërve, nevojtarëve, para formave të ndryshme të
varfërisë, edhe asaj shpirtërore. Këta njerëz na presin e në ta na pret Zoti”. Në
përfundim të vizitës së tij në famullinë e Fytyrës së Krishtit në Maljana të Romës,
Benedikti XVI u takua me fëmijët që përgatiten për Kungimin e Parë: “Të dashur
fëmijë…Jam i lumtur që ndodhem këtu me ju, megjithëse koha është e keqe e sot jemi
zgjuar një orë përpara… Dëgjoj se po përgatiteni për Kungimin e Parë. Në qendër të
tij nuk është dreka, por vetë Jezusi. Pastaj, edhe dreka mund të jetë e mirë… Urime
për të gjithë ju! Lutuni për mua, unë lutem për ju!”