Пабачыла свет кніга акадэміка Радзіма Гарэцкага “Браты Гарэцкія”.
Менавіта гэтай кнігай МГА “Згуртаванне беларусаў свету “Бацькаўшчына” распачало новую
падсерыю – “Людзі Беларусі” – у кніжнай серыі “Бібліятэка Бацькаўшчыны”. Выхад
кнігі прымеркаваны да юбілею Максіма Гарэцкага, славутага беларускага пісьменніка,
педагога, навукоўца, якому ў мінулым годзе споўнілася б 115 год. Нягледзячы на свой
нядоўгі век (у 45 год быў расстраляны ў Вязьменскай турме), М. Гарэцкі зрабіў шмат
для гісторыі. Доўгі час творчасць пісьменніка была пад забаронай у нашай краіне. Кніга
ўяўляе сабой сапраўдную энцыклапедыю роду Гарэцкіх, утрымлівае ўнікальныя дакументы
і сведчанні пра жыццё і дзейнасць выбітных дзеячаў беларускага нацыянальнага руху
ХХ стагоддзя: Максіма Гарэцкага – класіка беларускай літаратуры, літаратуразнаўцы,
крытыка, рэдактара-выдаўца, мовазнаўца, фалькларыста, педагога, публіцыста; Гаўрылы
Гарэцкага – аднаго з заснавальнікаў Беларускай акадэміі навук, вядомага эканаміста,
дэмографа, геолага, географа, археолага. У кнізе размешчаны фотаздымкі з сямейнага
і дзяржаўных архіваў, а таксама архіваў сяброў. Кніга разлічаная на шырокае кола чытачоў.
“Кніга “Браты Гарэцкія” – гэта даволі арыгінальны зборнік дакументаў, прысвечаны роду
Гарэцкіх. Да гэтага моманту сабраныя тут дакументы не друкаваліся анідзе. І выданне
кнігі, вядома, прысвечана юбілею Максіма Гарэцкага”, — кажа Радзім Гарэцкі. Выданне
кнігі стала магчымым пры ўдзеле беларускай мецэнаткі, старшыні фонду “Этнічны голас
Амерыкі” Ірэны Каляды-Смірновай, якой МГА “ЗБС “Бацькаўшчына” і аўтар кнігі Радзім
Гарэцкі выказваюць падзяку.