Editorial i atë Federiko Lombardit: “Dy engjëj për Afrikën”
(28.03.2009 RV)Bashkësia e krishterë
nuk i harron dy vajzat që humbën dramatikisht jetën, një javë më parë, ndërsa po përpiqeshin
të hynin në Stadiumin e kryeqytetit të Angolës, ku të rinjtë u takuan me Papën Benedikti
XVI. Një delegacion i Vatikanit shkoi në spitalin ku u dërguan trupat e vajzave. Të
dëgjojmë reflektimin e drejtorit tonë të përgjithshëm, atë Federiko Lombardit:
“Pashë
vetëm fytyrat e tyre të ëmbla e të rregullta, dukej sikur po flinin të qeta, mbështjellë
në çarçafë të bardhë në një sallë të madhe bosh të Spitalit Maria Pia. Sa mijëra fytyra
të gëzuara vajzash në festë admiruam rrugëve të Luandës ato ditë! Me siguri, ishin
edhe ato mes tyre. Selinë, 22 vjeç, dhe Ana, 21, humbën jetën të shtyra ose të shtypura
nga turma në portën n.4 të Sadiumit dos Kokeiros, ku donin të merrnin pjesë në festën
e madhe të të rinjve me Papën. Katekiste e para, anëtare e një grupi vokacional e
dyta, e përfunduan rrugën e tyre tokësore të fesë e të impenjimit në një mënyrë të
dhunshme e të papritur, por tani, do t’i shoqërojnë në një mënyrë të re miqtë dhe
mikeshat e tyre, rininë afrikane të etur për shpresë dhe ideale. Qindra
mijëra skautët, djem e vajza, që bashkëpunonin bujarisht për suksesin e vizitës së
Papës, gratë e lëvizjeve katolike, të vetëdijshme për rolin e tyre qendror në jetën
e Kishës e të shoqërisë afrikane, katekistet e katekistët, e shumë të tjerë të impenjuar
si ata, janë me të vërtetë shenja konkrete të asaj shprese të Afrikës e për Afrikën,
për të cilën Papa foli shpesh në Kamerun dhe Angolë. Mund dhe duhet të mbështetemi
te këto forca, që Kisha në Afrikë t’i shërbejë me të vërtetë pajtimit, drejtësisë
e paqes, jo me fjalë, por me vepra. Për t’i hapur rrugët e së ardhmes një kontinenti
të martirizuar, ç’është me e nevojshme se një rini që di të besojë, dojë e shpresojë?
Faleminderit Selinë e Ana që erdhët me ne në takimin e të rinjve me Papën. Nuk do
t’ju harrojmë! Do të na shoqëroni akoma si engjëj përgjatë rrugës drejt së ardhmes
të Afrikës!”