Predikimi i tretë i Kreshmëve. Atë Kantalamesa Papës dhe Kuries Romake: “lëshojeni
veten në dorën e Shpirtit të Shenjtë”
(27.03.2009 RV)Atë Raniero Kantalamesa
mbajti sot paradite predikimin e tretë të Kreshmëve për Kurien Romake, në praninë
e Papës Benedikti XVI, në Kapelën Redemptoris Mater në Vatikan. Ai u përqëndrua
në temën e Shpirtit të Shenjtë si udhëheqje e brendshme, duke marrë si shembull Shën
Palin Apostull: “Për të – tha atë Kantalamesa – Shpirti i Shenjtë nuk është
vetëm “mësuesi i brendshëm”; është parimi i jetës së re (ata që udhëhiqen prej Tij
bëhen bij të Zotit!); nuk kufizohet të na tregojë se ç’duhet të bëjmë, por na jep
edhe aftësitë për të zbatuar urdhërin e Tij”. Shpirti i Shenjtë, vazhdoi frati
kapuçin, na udhëheq jo vetëm kur duhet të marrim vendime të mëdha e të rëndësishme,
por edhe në gjërat e vogla të jetës: “Pali e Timoteu duan të predikojnë Ungjillin
në Azi, por “Shpirti i Shenjtë ua ndalon”… Kuptohet më vonë pseja e këtij urdhëri
të prerë: Shpirti i Shenjtë e shtynte kështu Kishën e sapolindur të dilte nga Azia
dhe të shihte drejt kontinentit të ri, drejt Evropës”. Shpirti i Shenjtë i
flet ndërgjegjes së çdo njeriu, besimtar ose jo, duke i dhënë frymëzimin, ndriçimin
e brendshëm. E në këtë mënyrë, personat… “…Shtyhen të ndjekin të mirën e t’i
largohen së keqes… E pikërisht duke u bazuar në këtë aspekt etik të personit, shkencëtarë
e biologë të famshëm bashkëkohorë kanë shkuar përtej teorisë, që e konsideron njeriun
si rezultatin e rastësishëm të seleksionimit të llojit. Nëse ligji që qeveris evolucionin
është vetëm lufta për ekzistencën e më të fortit, si shpjegohen aktet e altruizmit
të sinqertë e madje edhe të flijimit të vetvetes për kauzën e së vërtetës e të drejtësisë?” Atë
Kantalamesa foli pastaj për dy mënyra për ta dëshmuar veprimin e Shpirtit të Shenjtë:
atë të brendshme dhe atë të jashtme. Këto dy përmasa duhen bashkuar. Në fakt, vuri
në dukje frati kapuçin, kur lihet mënjanë përmasa e brendshme, njerëzit bien lehtë
në autoritarizëm, ndërsa kur nuk mbahet parasysh ajo e jashtme, apostolike, bihet
lehtë në subjektivizëm dhe fanatizëm: “Kur çdo gjë reduktohet vetëm në dëgjimin
personal, privat, të zërit të Shpirtit Shenjt, i hapet rruga një procesi të pandalshëm
ndarjesh e nënndarjesh, pasi secili mendon se ka të drejtë. Vetë ndarja e shumëfishimi
i sekteve, shpesh në kontradiktë ndërmjet tyre në pika thelbësore, tregon se nuk është
i njëjti Shpirt i Zotit që u flet të gjithëve, pasi përndryshe Ai do të ishte në kontradiktë
me vetveten. Ky dihet se është rreziku që kalon sidomos bota protestante, e cila e
konsideron përmasën e brendshme të Shpirtit të Shenjtë si kriter i vetëm i së vërtetës,
kundër çdo përmase të jashtme, kishtare, përveçse asaj të Fjalës së shkruar”. Pastaj,
me arritjen e racionalizmit, shtoi atë Kantalamesa, Shpirti i Shenjtë fillon e konsiderohet
njëlloj me shpirtin e njeriut. Por edhe mbivlerësimi i përmasës së jashtme të veprimit
të Shpirtit të Shenjtë është i rrezikshëm, pasi do ta reduktonte udhëheqjen e Kishës
vetëm përmes magjisterit të saj zyrtar, duke mohuar shumëllojshmërinë e karizmave,
edhe individuale: “Në këtë rast, mbizotëron lehtë elementi njerëzor, organizativ
dhe institucional; favorizohet pasiviteti dhe i hapet porta mënjanimit të laikëve
dhe klerikalizimit të tepërt të Kishës. Si gjithnjë, edhe në këtë rast, duhet të gjejmë
sintezën e dy përmasave, që është kriteri me të vërtetë “katolik”. Ideale do të ishte
harmonia e shëndoshë ndërmjet asaj që Shpirti i Shenjtë më thotë mua veçanërisht,
asaj që i thotë Kishës si bashkësi e nëpërmjet Kishës, personave”. Në fund,
atë Kantalamesa mori si shembull shën Palin Apostull, për të treguar se si duhen ndjekur
këshillat e Shpirtit të Shenjtë, këtij zëri të fshehtë brenda nesh, që na fton të
bëjmë vullnesën e Zotit. E për të na ndihmuar në marrjen e vendimeve, përmendi këshillën
që Shën Bernardi i jepte një pape: “Këshilla ishte kjo: nuk mund të dëgjosh
gjithçka, të kuptosh gjithçka ndodh përreth teje. Atëherë, rri para Zotit e paraqitja
çështjen Hyjit. Ç’do të thotë kjo? Do të thotë t’i japësh mundësi Zotit të ndërhyjë,
sepse Zoti do e bën. Nëse nuk dëgjohet ndonjë zë i qartë që thotë “bëj kështu, bëj
ashtu”, s’ka rëndësi: i ke dhënë Zotit mundësinë të ndërhyjë. Shembulli më i ndritur
është pikërisht në jetën e Jezusit. Nëse lexojmë me vëmendje Ungjillin, shohim se
Jezusi nuk bënte asgjë pa Shpirtin e Shenjtë. Kështu edhe ne, duhet t’i hapim veshët
gjithnjë për ta dëgjuar zërin që na flet nga brenda. Nëse do të dimë ta dëgjojmë,
do të na thotë gjithnjë çfarë i pëlqen Zotit në atë moment”.