Meditimet e Udhës së Kryqit e marrin zërin nga Kisha indiane
(27.03.2009 RV)Pas dy javësh, të
Premten e Madhe, Kisha do të rijetojë një nga momentet qendrore të Vitit liturgjik.
Si çdo vit, Papa Benedikti XVI do të kryesojë Udhën e Kryqit në Koloseumin e Romës.
Meditimet e saj i janë besuar kësaj radhe, kryeipeshkvit indian të Guvahatit, imzot
Tomas Menamparampil. Një shenjë e qartë vëllazërimi me besimtarët indianë, të cilët,
sidomos në shtetin e Orisës, sprovohen nga dhuna e persekutimi. Të dëgjojmë vetë kryeipeshkvin
në mikrofonin tonë: Besoj se duhet të meditojmë mbi temën e së keqes në botë,
kjo është temë shumë e rëndësishme për ne. Dhimbja, vuajtjet e ndryshme janë simbol
i pranisë së Kryqit të Krishtit në jetën tonë. Duhet t'i pranojmë, sepse vuajtja ka
forcë shëlbuese. Shkojmë gjithnjë te Kryqi për frymëzim, por edhe kur persekutohemi
e kemi vështirësi, duhet të themi “Jezusi është me ne” e duhet të ecim përpara me
Të e Kryqin e Tij. Por cila është gjendja e të krishterëve sot në Indi, sidomos
në shtetin e Orisës? Pyetëm kryeipeshkvin e dioqezës indiane të Nashikut, imzot Feliks
Maçado: Shumica është kthyer në shtëpi dhe gjendja është përmirësuar, por jam
i shqetësuar për ata që kanë mbetur në kampet e refugjatëve. Kisha po aktivizohet
për këtë. Për shembull, dje në dioqezën time, që është e varfër, një famulli ka grumbulluar
të holla, të cilat m’i dhanë e më thanë: “Ne duam t'i ndihmojmë akoma këta vëllezër
e këto motra tona të shkreta”. Kjo shenjë solidariteti ndërmjet kishave në Indi më
pëlqen shumë. Të gjithë të krishterët në Indi janë pranë përmes solidaritetit dhe
po mbështesin kishën e Orisës, e cila ka vuajtur shumë.