Hilari Klinton akuzon Korenë e Veriut se po provokon Kombet e Bashkuara
(26.03.2009 RV)“Provokim
që mund të ketë pasoja edhe në OKB”. Kështu e paralajmëroi dje Korenë e Veriut Sekretarja
e Shtetit, Hilari Klinton e cila gjendet për një vizitë në Meksikë. Koreja e Veriut
ka vendosur tashmë një raketë në shtratin e saj dhe është gati ta lëshojë. Udhëheqja
politike e vendit është e gatshme të vazhdojë me zbatimin e programit. Pas një periudhe
relativisht të qetë, siç shihet, Koreja po ndërmerr edhe njëherë rrugën e armatimit.
Po si shpjegohet ky ndërrim i kursit? Në mikrofonin tonë flet Rosela Ideo,
docente e Historisë Politike dhe Diplomatike të Azisë Lindore pranë Universitetit
të Triestes:
Përgjigje: Kjo ndodh sepse Koreja e Veriut e ndjen veten përsëri
të zënë ngushtë, ndihet e braktisur dhe në fakt, administrata Obama nuk e ka bërë
ende të ditur politikën që do të ndjekë kundrejt Koresë. Siç e dimë Amerika po përjeton
një periudhë krize ekonomike me përmasa të gjera dhe tani për tani, kjo është edhe
përparësia e vërtetë e administratës Obama, ashtu sikurse për sa i përket politikës
së jashtme është e qartë se Irani dhe gjendja në Lindje të Mesme kërkojnë një vëmendje
të posaçme nga kjo administratë.
Pyetje: Ju porsa u kthyer nga Seuli, ku
morët pjesë pikërisht në një simpozium kushtuar Koresë së Veriut. Ç’ klimë gjetët
atje?
Përgjigje: Një shqetësim tepër të madh dhe ky shqetësim është sepse
pritet një krizë humanitare shumë e afërt. Problemi kryesor i çështjes koreanoveriore
nuk është se tani mungon ndihma në energji elektrike porse ky vend nuk ka një rrjet
elektrik të mjaftueshëm për ta çuar energjinë në të gjithë vendin. Gjithnjë e më shpesh
kryeqyteti Pjong Jang zhytet në errësirë dhe nuk ka sektor të ekonomisë që arrin t’i
bëjë ballë asgjëje në një kohë kur mungesa e energjisë bëhet gjithmonë e më dramatike.
Shqetësimi i të gjithëve në vend është pikërisht ai i një kolapsi të plotë, dhe si
pasojë njerëzit kanë frikë se nga çasti në çast mund të kalojnë në një krizë humanitare
si ajo e viteve ’90.