Ipeshkvijtë e Kamerunit: afrikanët e kuptuan mirë mesazhin e Papës, mediat perëndimore
jo.
(25.03.2009 RV)Shembull i informacionit të keq, që u përpoq të errësojë domethënien
e vërtetë të udhëtimit të Papës në Afrikë: kështu denoncojnë ipeshkvijtë e Kamerunit
në një komunikatë, që u referohet polemikave të botës perëndimore mbi fjalët e Benediktit
XVI për përdorimin e prezervativit në luftën kundër Sidës. Shtypi perëndimor,
shkruajnë ipeshkvijtë, i ka lënë mënjanë aspektet thelbësore të mesazhit të Papës
në Afrikë, i cili foli për varfërinë, pajtimin, drejtësinë e paqen. E as u kujtua
për përpjekjet e jashtëzakonshme të Kishës afrikane për të zhdukur sëmundjen e Sidës.
Një impenjim, që gjen shprehjen e vet në shumë struktura katolike, të cilat u japin
asistencë morale, mjekësore e shpirtërore të sëmurëve nga Sida. Nga ana tjetër,
theksojnë ipeshkvijtë, atë që nuk e kuptuan mediat perëndimore, e kuptuan mirë kamerunezët,
të cilët e pritën Atin e Shenjtë me gëzim e entuziazëm. Besimtarët afrikanë e dinë
mirë se Papa “e ka njeriun në qendër të shqetësimeve të tij dhe u referohet mësimeve
të Krishtit”. Kisha i lejon secilit të vlerësojë dinjitetin e vet, si bir i Zotit.
Edhe në kurimin e të sëmurëve nga Sida, Kisha Katolike sjell një këndvështrim të ri
mbi njeriun e mbi botën, përfundojnë ipeshkvijtë e Kamerunit.