(24.03.2009 RV)Bie sot 10-vjetori i fillimit të ndërhyrjes së NATO-s në mbrojtje
të popullsisë kosovare nga dhuna serbe. Dhjetë vjet pas luftës së përgjakshme, që
shkaktoi viktima e refugjatë, la njerëzit pa shtëpi e i detyroi të emigronin, Kosova
përpiqet të bëjë një bilanc. Aspiratat e popullit të saj shqiptar u plotësuan me shpalljen
e pavarësisë në shkurtin e vjetshëm e me njohjen e gjithnjë e më tepër vendeve, që
aktualisht kanë arritur numrin 56. Por, a u mbyllën plagët e luftës? A janë të kënaqur
kosovarët me shoqërinë, që po ndërtohet aktualisht në Kosovë? Në fjalimin e sivjetëm
drejtuar Trupit Diplomatik pranë Selisë së Shenjtë, Papa Benedikti XVI, mes tjerash,
kujtoi edhe Ballkanin e, në mënyrë të posaçme, Kosovën. “Selia e Shenjtë është
e impenjuar për stabilitetin në jug lindje të Evropës e shpreson që të vijohet me
krijimin e kushteve për një të ardhme në pajtim e paqe ndërmjet popullsive të Serbisë
e të Kosovës, duke respektuar pakicat e pa harruar mbrojtjen e trashëgimisë së çmuar
artistike e kulturore kristiane, që përbën pasuri për mbarë njerëzimin”. Ky
do të ishte programmi për të ardhmen e vendit, sot tepër i zënë në kujtimin e genocidit
të pësuar e në evokimin e trimërive të UÇK-së. Kryeministri i Kosovës, Hashim Thaçi
deklaroi se populli kosovar do t’u jetë gjithmonë mirënjohës amerikanëve, evropianëve,
vendeve të tjera të NATO-s, të cilat dëgjuan thirrjen e familjeve për ndihmë dhe ndërhynë.
Nga të gjitha anët, theksohet se në Kosovën e re nuk do të ketë vend për urrejtje
dhe dhunë. Se cilat ishin aktivitetet e sotme, na njofton Rabije Ibraj nga Pristina