Në Engjëllin e Tënzot, Papa ua besoi lutjeve të angolezëve Asamblenë e Posaçme të
Sinodit të Ipeshkvijve për Afrikën dhe u lut për paqe në zonën e Liqeneve të Mëdha.
(22.03.2009 RV)Në lutjen e Engjëllit
të Tënzot, Papa rikujtoi bindjen pa kusht të Marisë ndaj vullnetit të Hyjit. E përmes
kësaj bindjeje plot besim të Virgjërës, Biri i Zotit erdhi në botë për të sjellë faljen,
shëlbimin e jetën. Duke u bërë njeri si ne në gjithçka, përveç mëkatit, Krishti na
mësoi dinjitetin dhe vlerën që ka çdo anëtar i familjes njerëzore. Vdiq për mëkatet
tona, për të na mbledhur gjithë bashkë në familjen e Hyjit. Kështu u shpreh Papa e
në vijim theksoi: “Lutja jonë lartohet sot nga Angola, nga Afrika, e pushton
mbarë botën. E burrat e gratë nga të katër anët e botës, që bashkojnë zërin në lutjen
tonë, i sjellin sytë nga Afrika, nga ky Kontinent i madh, plot me shpresë, por ende
i etur për drejtësi, për paqe, për zhvillim të shëndoshë të gjithanshëm, që uroj t’i
sigurojë popullit të tij një ardhmëri me progres e paqe”. Më pas Benedikti
XVI u kërkoi gjithë besimtarëve të luten: “Ia besoj lutjeve tuaja punën përgatitore
për Asamblenë e Dytë të Posaçme të Sinodit të Ipeshkvijve për Afrikën”. E
uroj - vijoi Ati i Shenjtë – që katolikët e këtij Kontinenti, të frymëzuar nga besimi
në Zotin e në premtimet e Jezu Krishtit, të bëhen gjithnjë më shumë tharm ungjillor
shprese për gjithë njerëzit vullnetmirë, që e duan Afrikën, i kushtohen progresit
material e shpirtëror të bijve të saj e përhapjes së paqes, të prosperitetit, të
drejtësisë e të solidaritetit, në dobi të së mirës së përbashkët. Benedikti XVI
iu lut Zojës së Bekuar, Pajtore e Afrikës: “Virgjër Mari, Mbretëreshë
e Paqes, vijo t’i prijsh popullit të Angolës në përpjekjen për pajtimin kombëtar,
pas përvojës shkatrrimtare e çnjerëzore të luftës civile. Këtu,
në Afrikën e Jugut – vijoi Papa - t’i lutemi në mënyrë të posaçme
Zojës së Bekuar të ndërmjetësojë pranë Zotit për paqen, shndërrimin e zemrave e përfundimin
e konfliktit në zonën e afërme të Liqeneve të Mëdha. Uroj që Biri i saj, Princi i
Paqes, t’i shërojë ata që vuajnë, t’i ngushëllojë ata që qajnë e t’u japë forcë të
gjithë atyre, që çojnë përpara procesin e vështirë të dialogut, të bisedimeve e të
përfundimit të dhunës”. Pas lutjes së Engjëllit, Papa u rikthye
në Nuciaturën Apostolike, ku kaloi drekën së bashku me grupin shoqërues.