Papa myslimanëve të Kamerunit: “Besimi në Zotin nuk na vë kundër botës, larg qoftë,
por na impenjon për të mirën e saj.”
(19.03.2009 RV)Sot paradite, përpara
Meshës Shenjte, Papa u takua me përfaqësuesit e bashkësisë myslimane të Kamerunit,
të cilët i priti në Nunciaturën Apostolike. Benedikti XVI tha se ishte i lumtur për
“këtë mundësi kaq premtuese” për përforcimin e “lidhjeve që bashkojnë të krishterët
dhe myslimanët” të cilët besojnë “në një Zot të vetëm e të mëshirshëm”.
“Një
shenjë kuptimplote, ky takim – e nisi fjalën e tij Benedikti XVI – që tregon për dëshirën
“për të shkëmbyer ide sesi feja jep kontribut themelor për të kuptuar kulturën e botës
dhe për bashkekzistencën paqësore”. Papa nxiti dialogun ndërfetar, i cili rrit dhe
mbështet “formimin e një rendi politik të qëndrueshëm në kohë” në Kamerun, ku me
mijëra të krishterë dhe myslimanë, “shpesh jetojnë, punojnë dhe praktikojnë fenë e
tyre,” duke dëshmuar “vlerat e tyre themelore”: familjen, përgjegjësinë shoqërore,
bindjen ndaj Zotit, dashurinë ndaj të sëmurëve dhe atyre që vuajnë:
“Miqtë
e mi, unë besoj se një detyrë veçanërisht urgjente e fesë, - tha Papa – është që të
shfaqim dukshëm fuqinë e madhe të arsyes njerëzore”, “një dhanti e Zotit”, “e cila
është lartësuar nëpërmjet të Dëftuarit dhe fesë”. Prandaj “të besosh në Zotin, - larg
qoftë nga ne që ta paragjykojmë aftësinë tonë për të kuptuar vetveten dhe botën, -
vetëm sa e zgjeron atë. Kjo na impenjon për të mirën e botës, e nuk na vë kundër saj,
larg qoftë.” vijoi Benedikti XVI.
Që këtej buron edhe ftesa për “t’i ndihmuar
të tjerët të zbulojnë gjurmët e dukshme dhe praninë e mistershme të Zotit në botë”
në mënyrë që “të gjithë të zbulojnë se e arsyeshmja shkon përtej asaj që matematika
mund të llogarisë, që logjika mund nxjerrë si përfundim e që eksperimentet shkencore
mund të tregojnë; ajo çka është e arsyeshme “përfshin edhe mirësinë”, dhe do të thotë
të çosh një jetë të ndershme.
“Ky koncept na shtyn të kërkojmë – shpjegoi
më tej Ati i Shenjtë – gjithçka është e drejtë dhe e mirë, na shtyn të dalim nga korniza
jonë e interesit tonë të ngushtë egoist dhe të veprojmë për të mirën e
të tjerëve”.
“Një fé e pastër e zgjeron kësisoj horizontin e mirëkuptimit
njerëzor dhe është në themel të çdo kulture të vërtetë njerëzore”. Prandaj “i refuzon
të gjitha format e dhunës dhe të totalitarizmit: jo vetëm si parime fetare, por edhe
si pamundura për të qenë në themel të arsyes. Në fakt, feja dhe arsyeja – pohoi Benedikti
XVI – mbështesin njëra-tjetrën.”
Përpara ndarjes me përfaqësuesit myslimanë
Papa uroi që “bashkëpunimi ndërmjet myslimanëve, katolikëve dhe të krishterëve të
tjerë në Kamerun të jetë për të gjitha vendet afrikane një far i ndritshëm, që t’u
tregojë atyre se ç’forcë ka impenjimi fetar për paqen, për drejtësinë dhe të mirën
e përbashkët!”